Kujataani kommunit ataatsimiinnissaraluat kinguartippoq

Kujataani kommunit pingasut, Narsaq, Qaqortoq Nanortalillu, Nanortalimmi ullumi aqagulu ataatsimeeqatigiittussaagaluarput.

-Ataatsimiinnissaq sapaatip akunneranik kinguartippoq, Nanortallip borgmesteria, Kristine Raahauge tikittussaq angumersisinnaanngimmat, Kiista P. Isaksen, Narsap borgmesteria, oqarpoq.

Kristine Råhauge timmisartorsuarmut Danmark-meersumut ilaalluni Narsarsuarsuarmut ullumi tikitussaagaluarpoq. Timmisartorsuaq ippassarli tikittussaagaluaq teknikkikkut ajoquteqarnini pissutigalugu tikinngitsoorpoq, timmisartorsuullu ullumikkut angalassinissaralui tamarmik aamma unitsinneqarput.

Ataatsimiinnissaq pingaaruteqarluinnartunut ilaavoq, kommunit kattussuunnissaannut apeqqut oqaluuserisassanut pingaarnernut ilaanmmat. Nanortalimmi kommunalbestyrelsimi ilaasortat kattunissamut ulluoq manna tikillugu akerliujuarput.

Kattussuuttoqarpat kommunip iluani immikkoortoqarfiit ilai qitiusumut nunneqassappata, Nanortalimmi akileraartartut ikilissammata kattunnissaq orniginartinneqanngilaq. Taamaattoqassappat kommuni aningaasanik annaasaqassaaq, tamannalu akissaqartinneqanngilaq.

-Ataatsimiinnissaq tamanut ammasuusussaammat neriuutigaarput innuttaasut amerlasuut tusarnaariassasut, kattunnissamut tunngasunik paasinninnerulernermik kinguneqassammat, taama oqarpoq Qaqortup borgmesteria Simon Simonsen.