Kujataani jordbærit

Jordbærinik naatitsilluni misileraaneq ingerlaqqippoq misilittagaalersullu Islandimiunik Savalimmiormiunillu paarlaasseqatigiissutigineqarput. Kalaallit, Islandimiut Savalimmiormiullu jordbæriliassaat ukiuunerani sullulianiitinneqartarput.

Upernaviarsumi misileraavik salaatinik naatitanillu allanik naatitsinermik misilittagaqareerpoq. Maanna pissangallutik utaqqivaat kalaallit jordbæriutaat qanoq mamassuseqassanersut.

- Naatitanik naatitsinermi annertoorujussuarmik seqinermiititsisinnaavugut tassungali peqatigitillugu nunani allanisulli kiatsiginngimmat naatitavut isseqarnerullutillu tunguarninnerusarput. Neriuppugut aamma taama pisoqarumaartoq jordbærinik naatitsinermi, Anders Iversen Upernaviarsummiit KNR-imut oqarpoq.

Plastikinik sulluliat sananeqarneranni Nunatsinni Savalimmiunilu unnuaq anorersuarujussuartumi silap peqqarniissinnaanera piareersimaffigineqarpoq. Sulluliat qajannaatsut Nunatsinnut naleqquttut norskit suliffeqarfiat SINTEF suleqatigalugu ineriartortinneqarput.

Kalaallit jordbæriliaat qallunaat jordbæriliaannit sivisunerulaartumik naasarput qallunaat jordbæriutaat juunimi katersorneqartarlutik. Upernaviarsummiut neriuutigaat juulimi aggustilluunniit aallartilaarnerani katersisinnaassallutik.

- Paarnanik naatitsineq Kalaallit Nunaanni savaatillit saniatigooralugu aningaasarsiorfigilersinnaavaat. Aamma siunissaq eqqarsaatigalugu takorloorneqarsinnaavoq ribsit solbærillu aamma naatinneqartalernissaat, Anders Iversen oqarpoq.

Maanna misileraaneq aningaasalersorneqarpoq suliniummit Atlantberry-mit, taassuma siunertaraa paarnanik naatitsinerup Kalaallit Nunaanni, Islandimi Savalimmiunilu aningaasarsiutaasinnaalernissaa.