Kujataani ilinniarnertuunngorniat nunani avannarlerni nipilersornikkut pikialaarnermut peqataalersut
Kalaallit ilinniarnertuunngorniat nipilersornikkut pikialaarnermut peqataannginnerminni minutsinik qulinik sivisussusilimmik musicaliliorsimapput. Taannalu isiginnaartitsisarfimmi Savoyimi ataasinngornermi oktobarip 29-iani nal. 11.00 takutinneqassalluni. Helsingforsimi atuartut 700-t missaat isiginnaartorineqassapput.
-Musicalip suliarineqarnera sivisuumik ingerlassimavarput. Ataatsimeeqattaartarpugut isumassarsiarpassuillu eqqartorsimallutigit. Inernera angusimasarput pitsaalluinnartutut isumaqarfigaara, aamma isiginnaartitsissutissarput iluatsilluarparput. Helsingforsimi isiginnaartitsivik angisoorsuuvoq, taamaammat atuarfiup inersuata natia atorlugu isiginnaartitsivik meterinik qulinik atitutigisoq takorluukannerlugu sungiusarpugut, ilinniartitsisut Bjarne Kristoffersen Emiilia Benjaminsen peqatigalugu musicaliliornermi Helsingforsiliarnermilu aqutseqataasoq oqaluttuarpoq.
Isiginnaartitsissutip Savoyip isiginnaartitsisarfiani misilittarneqarnissaanut sapaatiuppat periarfissaqarpoq, musicalilli qulingiluat takutinneqartussaammata inissitassat kingulliit inissinniarnissaannut minutsit 50-iinnaat periarfissarineqarput. Bjarne Kristoffersenilli ilinniartut piginnaasaat tatigilluinnarpai kusanarluinnartumillu inerneqarnissaa qularutiginagu.
-Ilinniartuutivut pikkorissorsuarnik ilaqarput. Qitittartut erinarsortartullu qulit nipilersortartullu tallimat tamakkiisumik tunniussaqarnissaminnut piareersimapput. Qilaat tunngavigalugu isiginnaartitsissut suliarineqarpoq, qilaatersortoqassaaq musicalimilumi qilaat pingaarnertut atorneqartussaassalluni. Qullilersuinitta iluatsinnissaa neriuutigaarput, ilinniartitsisullu ilinniartullu isiginnaartitsivimmi isiginnaartorpassuaqarfiusumi minutsini qulini isiginnaartitsinissaq qilanaarisupilussuuarput, Bjarne Kristoffersen knr.gl-imut oqaluttuarpoq.