Kujataani Ilinniarnertuunngorniarfik pisortartaassaaq

Kulturimut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup Else Poulsen Kujataani Ilinniarnertuunngorniarfimmi Qaqortumiittumi aggustip aallaqqaataaniit pisortatut atorfinitsippaa.
Allattoq Elisa Isaksen
juulip 13-at 2009 17:07

Else Poulsen 53-inik ukioqarpoq, 1986-imilu tarnip pissusiinik ilisimasalittut marluinnik oqaasilittut siullersaalluni ilinniarnerminik naammassinnilluni.

Else Poulsen 2000-imiilli Kujataani PPR-imi tarnip pissusaanik ilisimasallit pisortaattut atorfeqarpoq. Aamma Nunatsinni ilinniarfinni ingerlaqqiffiusuni ilinniartitsiartortartutut censoriusartutullu misilittagaqarpoq.

Tarnip pissusaanik ilisimasalittut ukiorpassuarni sulinermi saniatigut, ilaatigut aamma imigassaq pillugu Siunnersuisoqatigiit allaffeqarfianni pisortatut siulittaasutullu sulisimavoq.

Else Poulsenip taarsissavaa Gregers Aagaard, 2004-mi aggustimiit ukiormanna maajip naanerani soraarninngornini tikillugu pisortaasimasoq.

Kujataani Ilinniarnertuunngorniarfik ukiumi atuarfiusumi 2008/2009-mi 130-t missaannik ilinniartoqarpoq, taakkunannga 100-t missaat ilinniarnertuunngorniarfiup ilinniartunut inaataanni najugaqarlutik. Ilinniarnertuunngorniarfik Kommune Kujallermeersunik ilinniartoqarnerusarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq