Kujataani borgmesterit: Kujataani angallanneq ajutuuissaaq
Kujataani angallanneq ajutuuittussaavoq, naalakkersuisut angallanneq pillugu periutsip nutaap ataasiinnaasup siunnersuutaa, ukiamut inatsisartuni akuerineqassappat. Taama oqariartuuteqarput kujataani borgmesterit pingasut, kujataani ukiuni tulliuttuni tallimani naalakkersuisut angallanneq pillugu allannguiniarnerannut tunngatillugu ataatsimiinnermi kingorna.
Periutsimik nutaamik atuutitsiniaalernerup tunngavigaa, silaannakkut angallannerup umiarsuakkut angallanermi pisariaqartitsineq matusinnaammagu, Air Greenland-ip silaannakkut angallannerulerneq sapinngimmagu kiisalu silaannakkut angallannermi akit appariartinneqarsinnaammata. Borgmesterillu pingasut nalunaaruteqarnerat malillugu, naalakkersuisut tamakku pillugit tamanut tusarniuteqarsimanngillat.
Ippassaq Arctic Umiaq Line kujataani borgmesterinut saaffiginnissutaani 2005-ip naaneraniit oqariartuuteqarpoq, kujataani umiarsuakkut illoqarfiit nunaqarfiillu akornanni angallaneq unitsinneqassasoq, Nuup Narsarsuullu akornanni umiarsuakkut angallanneq unitsinneqassasoq, kiisalu umiarsuarmik nutaamik 130-nik ilaasoqarsinnaasumik sanaartorniarneq unitsinneqartoq. Umiarsuarmik sanaartornissaagaluup massakkut pisariaqartitsinerup matussusertussaagaluarpaa, siunissamilu takornariaqarnerup tungaasigut annertunerusumik pisariaqartitsilernissaq.
Alajangiinerit taakku tunngavigalugit kujataani borgmesterit nalilerpaat, umiarsuakkut angalasartut 14.000-iusut inissat eqqarsaatigalugit, silaannakkut angalasartut 28.000-nik amerlatigisut unammillissagaat.
Ilanngullugu aamma oqaatigineqarpoq, ilaasut 50 procent-imik qaffattussat eqqarsaatigalugit, taamaallaat helikopterimik S-61-mik ataatsimik kiisalu helikopterimik nutaamik tallimanik ilaasoqarsinnaasumik taamaallaat angallanneqarsinnaammata. Ullumikkut atorneqarput helikopteri S-61-i ataaseq aamma Bell 212 qulingiluanik ilaasoqarsinnaasoq.
Ullumikkut umiarsuarmut ilaalluni Nanortallip Qaqortullu akornanni angalaneq 350 koruuninik akeqarpoq, helikopterimillu ilaaneq akeqarluni 1150 koruuninik. Allatut oqaatigalugu, akit qaffassapput angalaniarlutillu utaqqisut qaffassapput.
