Kujataani borgmesterinngortussaq tupigutsannartoq
- Kommune Kujallermi borgmesterinngornissara naatsorsuutigilluinnarpara.
Jørgen Wæver Johansenip nassuiarpaa, Kommune Kujallermi qinigaalluarsimanini sunik tunngaveqarnersoq.
- Tassa kujataamiut nutaaliorneq, allannguerusunneq aamma siunissamut neriuuteqarusunneq toqqarusussimavaat, tassalu qinersinerup inernerata tamanna takutippaa, Jørgen Wæver Johansen taama oqarpoq.
Simon Simonsenip ajorsarnini akueralugu oqaatigaa.
- Ajorsarnera akuerilluinnarpara, Jørgen Wæver Johansenip ajugaasutut borgemsterinngornissaa tapersersorluinnarpara aamma qularutigissanngilaa qinikkatut suleqatiginissaa qilanaarigakku, tassami misilittagaqarluarpoq kommunitsinnullu iluaqutaasinnaakutsoorluni.
Simon Simonsenip oqaatigaa ajorsarnini ilaatigut peqquteqartoq kommunip aningaasatigut ukiuni kingullerni ajornartorsiornera, Simon Simonsenilu ima nangilluni oqarpoq.
- Ukiut arfineq pingasut borgmesterioreerpunga. Ilisimalluinnarparalu qinersisartut naalagaasut, taamaammat ajorsarnera akueraara, nuannaarutigaaralu kujataani Siumut siuariarujussuarmat.
Simon Simonsen taama oqarpoq, taassumalu neriuutigaa borgmesterip sinniisissaattut siullertut piukkunneqarumaarluni ataatsimiititalianilu pingaaruteqartuni ilaasortaanissani neriuutigalugu.
