Kujataani ataasinngorpat isumaqatiginninniassapput

Kujataani kommunit kattunnissaannut qinersinermi Siumut amerlanerussuteqarpoq, Siumullu tunuliaqutaralugu qinigaasut arfineq-pingasuusut Qaqortumut ataasinngorpat tikeriarpata inissititerinissaq pillugu isumaqatigiinniartoqassaaq.
apriilip 11-at 2008 17:16

- Siullermik oqaloqatigeeqqaassaagut, isumaqarpungalu sapinngisamik siammasissumik maani suleqatigiittariaqartugut, taama radio aviisimut oqarpoq kujataani kommunit kattuppata Siumut tunuliaqutaralugu borgmesterinngorusuttoq Simon Simonsen.

- Asuliinnaaq arsartartunut sungiusaasuusimanngilanga, nalunngilarami kikkulluunniit arlaqarlutik suleqatigiissagunik tamarmik peqataatinnissaat qanoq pingaartigisoq. Taamaattumik isumaqarpunga pitsaanerpaassasoq maani partiit tamarmik tunngaviusussamut isumaqatigiilluarpata, Simon Simonsen ilaatigut taama oqarpoq, nangipporlu:

- Kisianni uanga nammineq inuttut tamanna isumagaara, takussavarpulli ataasinngorpat maani Siumut ataatsimiippat qanoq angusaqartoqassanersoq, qanorlu partiinut allanut oqaloqatiginnikkumaarnerluta, Simon Simonsen taama naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq