Kujataani anorersuaq attaveqaatitsigut angallannikkullu ajornartorsiortitsivoq

Nunatta kujataani sisamanngormalli anorersuarpoq. Anorersuarnera peqqutaalluni attaveqaatitigut attaveqarniarneq ullut arlerlugit ajornartorsiutaasoq Tele-mi paasissutissiisarfimmiit nalunaarutigineqarpoq:

Qaqaqortup eqqaani sakkortusaavimmi Simiutami teknikikkut akornuteqartoqarnera pissutaalluni Narsamut; Narsarsuarmut, Igalikumut, Qassiarsummut Kangilinnguanut Ivittuunullu mobiltelefonitigut, Internettikkut sinerissami radiukkut, qarasaatiatigut, timmisartunut attaveqaatitigut , radiukkut, TV-kkullu attaveqaatit ullut arlerlugit kipisaqattaartartut aatsaallu sila iluarseriarppat iluarsineqarsinnaasut Tele nalunaaruteqarpoq.

Aamma Arsuutaani sakkortusaaviup akornuteqarnera pissutaalluni Kangilinnguianut Ivittuunullu attaveqartoqarsinnaangikkallarpoq.

Attaveqatitigulli ajutoornerit ulluni tulliuttuni iluarsaakkiartorneqarsinnaangikkallarput, sulimi ullut arlallit kujataani anorersuarallassasoq Kangerlussuarmi DMI-i silasiortoq Flemming Skou oqarpoq:

-Ajuusaarnaraluarpoq; kisiannili suli ulloq unnuarlu sivisunerusumilluunniit anorersuarallassaaq. Naqitsiniisaffik naqitsinikitsuararsuaq takkuteqqissaaq taannalu anorersuarmik ulussaarsuannguuttartumik unnuaru aqagulu ulloq naallugu anorlertitsissaaq aatsaallu aqagu unnukkut unnuakkulluunniit.

Flemming Skou oqaluttuarpoq anori sakkukinnerpaaffiminiitilluni 25 sekundmiiterit, sakkortussuseqartartoq anoraasuarujussuartillunilu, 43 sekundmiiterit pallillugit ulussaarsuartut sakkortutigisartoq.

Flemming Skou aperaarput taama anorersuarujussuartarnera nalinginnaanersoq, akivoq:

-Aap, Kalaallit nunaanni taama anorersuartarnera nalinginnaavoq; kisiannili taama sivisutigisumik anorlerujussuaannavinnera nalinginnaanngilaq, kisiannili tassa sila tassa taama pissuseqarsinnaasarpoq, taamaattoqarneralu immikkut nassuiaatitassaqanngilaq.

Flemming Skou aamma oqarpoq sisamanngorpat anori qatsorpat nunatsinni sila nalinginnaasumik nillertikkiartoqqilissasoq.

Kujataani anorersuarnera pissutigalugu kujataanit kujataanullu timmisartuussinerit akunnernik 24-inik kinguaattooqqasut Air Greenlandimit nalunaarutigineqarpoq.

Katillugit angalasut 150-it anorersuarneranik peqquteqartumik Nuummi Narsarsuarmilu saperngupput.