Kujataani annertuumik radoneqassangatinneqarpoq

Misissueqqaarnerit, Asiaq,

NIRAS Greenlandilu suleqatigiillutik, nunap iluanit quppanit gas-imik, radonimik, puakkut kræfteqalersitsisinnaasumik peqarnersoq, 2003-mi maajimiit 2004-mi maajimut misissuiffigineqarpoq. Narsami, Qaqortumi Nuummilu illut najugaqarfigineqartut misissuiffigineqarlutik.

Asiaq-p qarasaasiakkut nittartagaani nalunaarusiami allaaserineqarpoq, radon annertooq, nunap sananeqaataa malillugu, Kujataani pinngorsinnaasoq, tamassumalu kingunerisinnaagaa illut najugarineqartut annertuumik radoneqarsinnaaneri.

Illoqarfiit Nanortalik, Narsaq Qaqortorlu nalunaarusiami pineqarput, Nunattali Kitaani illoqarfiit allat misissuffigineqarmata radoneqarnerat annikitsuaraannaasimavoq.

Misissuineq taamaattoq siuleqanngitsoq Namminersornerullutik Oqartussani Ineqarnermut Attaveqarnermullu Pisortaqarfiup suliakkiissutigisimavaa, Pisortaqarfillu nalunaarusiami siunnersorneqarpoq, sanaartornermi radoneqarfiit eqqumaffigineqassasut, sanaartorfiusussallu mininnagit aamma paasiniaaffigineqartassasut.