Kujataani takornarianik allanillu angalaniartunik angallassiniarneq ajorluinnarpoq.
Tamatumunnga pissutaavoq kikkut ataqatigiissaarisuussanersut kialluunniit ullumikkut ilisimanngimmagu. Eqqugaasussat tassaalerput marlunngunngornermi Islandimiit Narsarsuarmut tikittartussat aamma Islandiliarusuttut allat, assersuutigalugu Qaqortumeersut.
-Arctic Umiaq Line-p soqutigaa angallataatillit namminersortut attartussallugit, takornariat allallu ilaasussat orninniagaannut ingerlateqqinneqassammata, kisianni Namminersornerullutik Oqartussanit tapiiffigineqanngikkutta ajornaqaaq, tassami angallatinik attartorneq akisoorujussuummat, Arctic Umiaq Line-imi tuniniaanermi pisortaq Jette Larsen oqarpoq.
Ilaqutariinnut Qaqortumiit Islandiliarusuttunut neqeroorut pivisunngortinneqarsinnannngilaq, angallataatilinnik namminersortunik attartornissamut akissaqannginneq pissutigalugu.
- Isumaga naapertorlugu Namminersornerullutik Oqartussat angallannermik ataqatigiissaarinissaq akisussaaffigaat, Qaqortumi takornariartitsinermi pisortaq Petsi Høegh oqarpoq.
Islandimiit Narsarsuarmut timmisartuussisarnermi tapiissutaasartut Namminersornerullutik Oqartussat Aningaasaqarnermut Inatsisaanni 2006-mi peerneqarsimapput, taamaattumik ataqatigiissaarinissamik akisussaannginnerarput.
2003-miit 2005 tikillugu Namminersornerullutik Oqartussat Island-imilu Naalakkersuisut aveqatigiillutik aningaasartuutinik tapiissuteqartaraluarput.
-Tapiissutit peerneqarnerannut pissutaavoq, aqqut tapiissutitaqanngitsumik ingerlaannarsinnaasoq paasineqarmat, tassa namminersortunngorsaanermi niuerneq tunngavigineqalerluni, taama allappoq Michael Pedersen, Inuussutissarsiornermi Pisortaqarfimmi Angallannermut immikkoortumi pisortaq.