Kujataani angallanneq pillugu allannguisoqalerpoq
Atlantiku qulaallugu Narsarsuup Københavnillu akornanni timmisartuussisarnerup taamaatinneqarsinnaanera Kommune Kujallermi ernummatigineqarpoq, tamanna kujataata siuariartorneranut ineriartorneranullu aalajangiisuussammat.
Atlantiku qulaallugu timisartuussisarneq unitsinneqassappat Kommune Kujalleq timmisartuutileqatigiinnik allanik attaveqarnissaminnut piareersimasoq, Kommune Kujalliup borgemesteria, Simon Simonsen oqarpoq.
Air Greenlandip Kunuunnguaq pillugu attartornissamik isumaqatigiissutaa qaammatialuit qaangiuppata atorunnaartussaavoq, isumaqatigiissulli nutarterneqassanngitsoq Atuagagdliutini sapaatip akunnerata kingullermi saqqummersuni allaaserineqaqattaarpoq.
Timmisartuutileqatigiiffiup sipaarniuteqalerneranut atatillugu Kunuunnguaq tunineqartussanngortoq tusatsiakkanut ilaavoq.
Sipaarniuteqarnissamut piersaarusiassaq Air Greenlandimi siulersuisut novembarip qaammataani ataatsimiinnerminni isummerfigissavaat.
Narsarsuup Københavnillu akornanni timmisartuussisarnerup matuneqarnissaanik eqqoriaanerit timmisartuutileqatigiiffiup ualimut tusagassiortunik katersortitsinerani ilumoornersut paasinarsissaaq.
