Kujataani angalatitsiviit utaqqikatalerput
Aasaanerani Islandimiit kujataanut timmisartuussisarnermut isumaqatigiissut augustip aallaqqaataani taamaatissaaq, sulilu isumaqatigiissut nutaaq Naalakkersuisunit inissinneqanngimmat, nunani allani angalatitsiviit aappaagumut takornarianik angalatitsinissamut pilersaarusiorlutik aallarteruttorfianni nalornipput.
Tamanna kujataani toqqissisimajunnaartitsisoq Destination South Greenland-imi pisortaq, Tina Jensen oqarpoq:
- Naammagittarniarsarisariaqarpugut takornariaqarnikkullu suleqatitta nikallunnginnissaat neriuuteqarnissaallu anguniartariaqarparput suleqatigiinnarsinnaanissaat anguniaatigalugu.
Soorunami taamaattoqarnera nuannerpallaanngilaq akuersaarneqarsinnaananilu, nalunngilarami angalanissanut pilerisaarutiminnik tuniniaaniaraluartut taamaakkaluartorli nalullugu maanga angalatitsisinnaassanerlutik. Tamanna tatiginassutsimik apeqqusiineruvoq. Nunami allamiilluni paasiuminaatsinneqarpoq Kalaallit Nunaanni aappagu junimi takornariaqaleruttorfianut pilersaarusiortoqarsinnaanngimmat. Tysklandimit Islandimit USA-miillu sullitatisinniit apersuisoqartarpoq Kujataaniit Islandimut takornariarlutik ingerlaqqikkusuttunik, taakkulu paasitinneqarnissartik maannakkorpiaq pisariaqartippaat. Tamannali pisinnaanngilaq. Amerikami takornarianik Kalaallit Nunaannukartartunik sullissisuniit nalunngilara, ukioq maajip naalernerani Washingtonimiittoqarnerani kujataaniit Islandimut angalarusuttunik soqutiginnittoqaraluartoq, neqerooruteqartoqarsinnaanngimmalli tunuaannartariqarsimapput. Nalorninartoqartillugu angalanissanik piserusunngillat, erngertumik paaserusuttarpaat angalatitsisinnaanersugut imaluunniit naamik. Qaamatini marlunngortuni pisariaqatissimavarput sukumiisumik paasitinneqarnissarput, massakkorpiarlu pisariaqartipparput.
Taama oqarpoq Destination South Greenland-imi pisortaq, Tina Jensen.
Kujataani kommunit kujataaniit Islandimut silaannakkut aqqutip 300.000 kroninik tapiifiginissaannut piareersimapput, Islandip naalagaaffia 1,2 millioni kroninik tapiiniartoq, taamaattorli Kalaallit Nunaat aningaasanik amerlaqqataanik aqqutip qulakkeerneqarnissaa anguniarlugu taapeeqataaniarnerluni suli nalunaaruteqanngilaq.
Destination South Greenland-imit oqaatigineqarpoq aasat tamaasa Island aqqutigalugu takoriat tusindit Kalaallit Nunaannukartartut taakkulu aningaasanngorlugu 11 millioni kronit missaannik isertitsissutigineqartartut.
