Kujataamiut angallanneq pillugu tusarniarneqanngillat

juulip 07-at 2005 14:14

Kujataani borgmesterit pingasut Nanortalimmi ataatsimeeqatigiinnertik ullumi naggaserlugu Air Greenlandip allaffissornermut pisortaaneranik ataatsimeeqateqarput. Sinersortaatinik angallannerup ukiut tulliuttut tallimat ingerlaneranni timmisartukkut angallannermit taarseriartuaarneqarnissaanik Naalakkersuisut siunniussaqarnerat kujataani borgmesterit akerleraat. Innuttaasut tusarniarneqanngillat paasissutissiinerlu naammaginanngitsoq Qaqortup borgmesteria Simon Simonsen oqarpoq.

-Angallassinermi isumaqatigiissutip nutaap ilumut naammassineqarsinnaanissaa oqaluuseraarput. Angallanneq ukiortaamiit imatut isikkoqartinniarneqalerami, kujataani timmisartuinnakkut qulimiguulinnillu angallassisoqalissalluni, pissannganarporli Air Greenland taama angallassilernissaminut periarfissaqassanersoq. Air Greenlandimit tusartinneqarpugut tamanna saperneqarunnanngitsoq.

Air Greenlandip timmisartunik angallassinissi siunissami akulikilliniarpaa.

- Tamannali eqqarsartoqarpoq, tassami massakkorpiaq pissutsit imaapput soorlu Nanortalimmi aggustip qeqqa tikillugu Nanortalimmiit Nanortalimmullu timmisartornissat tamarmik ulikkaaqqallutik utaqqisoqarlunilu. Helikopteri taanna ataaseq atorlugu aappaagu angallassinissat ilumut naammassineqarsinnaassanersut pissanganarpoq.

Air Greenlandip siunissami timmisartumik angalasut amerlatsissappata billitsit 25 %-imik akikillineqarnissaat neriorsuutigisimavaa.

Simon Simonsen:

- Kisianni qaqugorpiaq akikillisaasoqassanersoq oqaatigisinnaannginnerarpaat. Umiarsuarnerup akiinut naleqqiussilluni timmisartornerup ilaatigut pingasoriaatingajammik akitsornissaa aamma oqaatigineqarpoq, tamannalu akueriuminaatsorujussuuvoq.

Angallannermik aaqqissuusseqqinnissaq pillugu innuttaasunut paasisitsiniaaneq naammaginanngitsoq Simon Simonsen oqarpoq.

- Isumaqatigiissutissaq qaammammi matumani atsiorniarneqarpoq. Atsioreernikoq Inatsisartut ukiaru akueriniartussaassavaat, innuttaasunullu aatsaat ukiaru paasisitsiniaaniarnerat soorunami naammaginanngilluinnarpoq. Tamakku pitinnagit paasisitsiniaanerit tusarniaanerillu ingerlanneqaqqaartussaangaluarput taamaaliorneq ileqquusarmat.

Kujataani borgmesterit ataatsimeeqatigiittut naalakkersuisunut sukumiinerusumik nassuiaaqqusipput. Timmisartukkut akinik appaaniarnermi suut tunngavigineqarsut, umiarsuit timmisartornermit taarserneqarniavinnersut taamaattoqassappallu takornariaqarnermut tunngatillugu qanoq eqqarsartoqarnersoq nassuiaqquneqarpoq.