Kujataamioqatigiit ataatsimoorfeqalissapput
Nanortallip, Qaqortup Narsallu Kommunii atsioqatigiillutik isumaqatigiissutigaat inuussutissarsiutinik siunnersorteqarfiit ataatsimoorfeqalissasut, Inuussutissarsiornermi piginneqatigiiffimmut pilersinniagaagaluamut taarsiullugu. Atsioqatigiinneq Narsarsuarmi isumasioqatigiiffiusumi pivoq. Taama innersuussuteqarnerup saniatigut kujtaamioqatigiit Inuussutissarsiornermik Siunnersortit pisortassaannik atorfinitsitsisussanngorput.
- Taassuma ataaniissinnaasutut ilaatigut eqqartorneqartut tassaapput, nunaateqarnermut siunnersorti dsg taavalu savaatillit peqatigiit allaffiat aammalu aalisarnermut siunnersortit, soorlu KNAPK-p ataani allaasinnaapput aamma. Imatut takorlooratsigu matu iserfik ataasiussasoq, tassa siunnersorteqarnermut ingerlatsiniarnermilu saaffiginniffissat ataatsimuussasut, Kiista P. Isaksen oqarpoq.
Taanna aperineqarpoq:
- Narsap kommunia ukiumi aggertumi nutaami assorujussuaq aningaasatigut isertitassaminik pisariaqartitsissooq. Assersuutigalugu inuit nutaat nutserarnerisigut taamalilluni akileraarutitigut isertitanut iluaqutaasussaassammata. Tamakku tunngavigalugit siunnersuutigilersaanngilisiuk taanna ataatsimoorfissaq centeri Narsamiissasoq?
- Uani pingaarnerpaasorivara, kujataata immikkoortuani ataatsimoorluta ineriartortitsiffissamik pilersitsinissaq. Taamaammat sumiissinnaajumaarnera eqqartorneqarumaarpoq, taavalu ataatsimoorluta taanna aalajangerumaarparput. Kisianni maannakkut kujaataata kommunit peqatigiiffiata forretningsudvalgiata ataatsimiinnerminni tamattaalluta isumaqatigiissutigisatsinnik, kujataata immikkoortuani inuussutissarsiornermi pisortaq Narsamiissasoq dsg-p aamma Narsamiinnera tunngavigalugu, taama oqarpoq kommunit kujataamioqatigiit siulittaasuat, Narsap borgmesteria, Kiista P. Isaksen.
Isumasioqatigiinneq ullunik pingasunik sivisussusilik Narsarsuarmi ippassaq naammassivoq, tassani peqataapput Inuussutissarsiornermi Naalakkersuisoq Siverth K. Heilmann, Namminersornerullutik Oqartussani atorfillit kujataanilu kommunit sinniisaat.
