Kujalliup Qaasuitsullu Kommuniisa missingersuutitik piareeraat

Qaasuitsup Kommuniani aappaagumut missingersuutit katillugit 1,3 milliardit koruunit missaannik aningaasartaqartut 63 millionit koruuninik sinneqartooruteqarnissamik naatsorsuuteqarfiusut kommunalbestyrelsip sapaatit-akunnerata siuliani akuersissutigai.

Aalisarnermit ingerlalluarnerusumit akileraarutitigut isertitaqarnerunissaq, takornariartitsinerup ineriartorfiunera sanaartugassallu amerlanerunerat pissutigalugit taama angusaqarnissaq naatsorsuutigineqartoq kommuni tusagassiorfinnut nalunaaruteqarluni allappoq.

Kommune Kujallermi kommunalbestyrelsip isumaqatigiissup 2017-imut missingersuutit sapaatit-akunnerata siuliani aamma akuersissutigai.  

Isertitassatut 549 millionit koruuningaat aningaasartuutissatullu 547 millionit koruuningajaat naatsorsuutigineqarput, kommunilu taamaalilluni 1 million koruunit sinnilaaginnarlugit sinneqartooruteqarnissamik naatsorsuuteqarluni.

Kommune Kujallermi borgmesterip missingersuutit iluarisimaarpai, aappaagu qinersisoqareerpat kommunalbestyrelsinngortussap aningaasatigut patajaatsumik toqqammaveqarnissaa qulakkeerneqassammat, Jørgen Wæver Johansen tusagassiorfinnut nalunaaruteqarluni taama allappoq.