Kujallermi piareersarfiit kattupput

Taassuma oqaatigaa, anguniakkat pingaarnerit ilagigaat, suliffeqarfiup siunissami qulakkeerneqarnissaa, immikkoortumut annerusumut nukittunerusumullu inissillugu, taannalu aningaasanut ikinnerusunut inuusuttunullu ikinnerusunut naleqqussarneqassalluni.

Inuussutissarsiornermut suliffeqarnermullu Ingerlatsiviup aamma Piareersarfiit aqutsisuisa akornanni qanimut suleqatigiinnikkut, kattunnissaq piareersarneqarpoq soorlu aamma sulisut isumasioqatigiinnermut peqataatinneqarsimasut, tamatumani kattunnissaq suliniutissallu nutaat oqaluuserineqarlutik.

Tusagassiuutinut nalunaarummi oqaatigineqarpoq, Piareersarfiup Kujalliup upernaamut immikkut ittumik suliniuteqarnissaq aallartissagaa,  tamatumani saaffigineqassallutik inuusuttut meeqqat atuarfiinit anisimasut ilinniagaqalernissamut suliffeqalernissamulluunniit ingerlariaqqissimanngitsut.