Kujallermi borgmesterip aaqqiissutaagallartoq iluarivallaanngilaa
Naalakkersuisulli inuiaqatigiinni naligiinnginnerup annikillisarneqarnissaanut taama ajornartigisumik pisariaqartumilli aalajangiisinnaanissaminnut sapiissuseqarmata nersualaartariaqarsorai.
- Kisianni ikaarsaarnermut atatillugu aaqqiissuutaagallartup taamaallaat 2015-imut atuuttussaanera uatsinnut isumallualersitsivoq. Tassami ungasinnerusoq isigalugu aaqqiissutissaq aatsaat 2015-imi naammassillugu ilusilerneqarsinnaanngussaaq, taamalu aatsaat 2016-imiit atuutsilivissalluni.
- Tamatumunnga atatillugu kajumissaarutigissavara ungasinnerusoq isigalugu nalimmassaanikkut aaqqiissuteqartarnissamut atatillugu isumaginnitoqarnerup tungaatigut qulakkeerinneriaatsit pioreesut saniatigut kommunit tulleriiaariffigineqarnerini piitsuussutsimik akiuiniarnerup qitiutilluinnarneqartalernissaa politikikkut toqqammavissalersorneqassasoq, Jørgen Wæver Johansen oqarpoq.
AAMMA ATUARUK Naligiissaarinissaq inerneqarpoq: Sermersuup 54 mio. koruunit pilliutigissavai
Borgmesterip aamma oqaatigaa pisortat suliffiutaasa nunatsinni illoqarfinnut amerlanernut siammarterneqarnerunissaannik partiit arlallit qineqqusaaruteqarsimanerisa piviusunngortinneqarnissaannut piffissanngortoq, soorluttaaq taamaaliortoqarnissaa aamma Namminersorneq pillugu Isumalioqatigiissitami ilaasortaasimasut akunnerminni assortuussutiginngilluinnarlugu innersuussutigisimagaat, kingornalu aamma tamanna Inatsisartut 2004-imili isumaqatigiilluinnarlutik akunnerminni siunnerfissatut isumaqatigiissutigisimagaat.
Kommunit sisamaasut ilisimasaqassutsikkut piginnaasaqassutsikkullu qaffassaavigineqssapput
- Taamaaliornikkut aamma qulakkeerniarneqarpoq sanaartugassat sinerissamut siammarnerullugit aningaasaliiffigineqartalissasut. Tassami taamaaliortoqarneratigut nunap immikkoortui sisamat ilisimasaqassutsikkut piginnaasaqassutsikkullu qaffassaavigissavagut.
- Nalimmassaarutinik agguuasarnerup pisariaqartinneqarnera siunissami sapinngisamik annikillisarniarlugu sumiiffiit ineriartortitsiffiusut sisamat pilersissavagut, sumiiffimmik ataasiinnamik ineriartortitsiveqarnissaq siunnerfigiunnaarlugu. Taamaaliornitsigut pisortat pilersitaannit aningaasarsiorfiusut nalingiinnerusumik agguataarneqarnissaat qulakkeersinnaassavarput, Kommune Kujallermi borgmesteri Jørgen Wæver Johansen taama erseqqissaavoq.
