Kugluktutmi inuusuttut imigassamik atornerluinermut akerliugamik ajugaasut
Kuglutuk-mi inuusuttut imigassamik killilersuisitsiniaallutik qaammatit kingulliit suliniuteqarnerannut inersimasut 66 procentii akuersipput.
Oqaluttuaq aallartippoq Kuglutuk-mi, 1.400-nik inulimmi aasaq politeeqarfiup nutartserneqarnissaata nalaani, politiit artukkerneqaqqunagit imigassaq inerteqqutigineqalermat.
Inuit imigassartaqanngitsumik aasarsiornerat ilaqutariinnut pilluarfiusimavoq. Inuusuttummi angajoqqaavi aalakoorajuttut imerunnaarlutik meeqqatik asiaqatigisarsimavaat ilaqutariillu toqqissisimanartumik alianaarsaaqatigiittarsimallutik.
Qaammalli ataaseq qaangiummat politeeqarfiup nutartserneqarnera naammassimmat imigassaarniarneq ammarneqaqqissimavoq, qangatuullu pissutsit ingerlaqqilersimallutik; inuit aalakkuteqqilerllutik, kamaattoqartuaqqilerluni imminullu toquttarnerit nangeqqillutik.
Inuusuttulli pilluarlutik aasarsiorsimasut imigassap killilersorneqarnissaa anguniarlugu suliniuteqarnissaminnut nukissaqarlualersimapput. Allagartarsuarnik nassarlutik akerliussutsimik takutitseqattaariarlutik, isiginnaagassiorsimapput aalakuttut qanoq meeqqanut inuusuttunullu sunniuteqartarnersut inersimasunut takutinniarlugu.
Kuglutuk-rmiullu ippassaani qinersigamik illoqarfimminni suliniaqatigiiffimmik, imigassamik killilersuisinnaatitaasumik pilersitsinissaq amerlanerussuteqartut akuersaarsimavaat. 2003-mi assigusumik qinersititsineqarmat amerlanerussuteqartut killilersuinissamut itigartitsisimagaluartut maanna 66 procentii akuersaarput.
- Tanngassimaaqaanga, soorluuna qinnutivut tamarmik tusarneqarsimasut, 14-inik ukiulik Danielle Meyok, atuagassiamut Globe and Mail-imut oqarpoq.
Akilinermi Inuit kattuffianni, Inuit Tapiriit Kanatami siulittaasup, Mary Simonip Kuglutuk-mi inuusuttut nersualaarpai. – Inuusuttut pimoorussillutik imigassap ajornartorsiutaanerata iluarsiiffiginiarneqarneranut iliuuseqarmata ataqqivakka, inoqarfinni allani inuusuttunut imatut oqariartuuteqartutut immata, inuunerminni atukkatik, inersimasut tusaarusuppata sunneeqataaffiginiarsinnaagaat. Kuglutuk-milu angajoqqaat inuusuttamik oqariartuutaannut tusaarusussimapput, Mary Simon Globe and Mailimut oqarpoq.
Inuit akornanni inunnik isumagininnermut tunngasut Ottawami naalakkersuisunut iliuuseqarfigeqqullugit saaffiginnissuteqarluni Akilinermi oqalugiaqattaarluni Mary Simon angalaleruttorpoq.
