Kuannersuit pillugit innuttaasunut ataatsimiititsissaq februaarimut kinguartinneqartoq
Kuannersuarni aatsitassarsiornissamut suliniut assortuussutaasoq pillugu innuttaasunut ataatsimiititsinissat amerlanersuunit qilanaarineqaraluarput. Taakkuli utaqqeqqilaassapput.
Coronavirusip tuniluunnerata nalaani katersuuttarnermut maleruaqqusat malittarisassallu allat pissutaallutik Kuannersuarni suliassaq pillugu innuttaasunik ataatsimiititsinissat nuunneqarput, Naalakkersuisut nittartakkaminni allaaserisaqarput.
Innuttaasunik januaarip ulluisa 22-ata 26-atalu akornanni ataatsimiititsisoqartussaagaluarpoq, maannali februaarip ulluisa tallimaannit aallartillutik qulingiluaata tungaanut pisussatut pilersaarutigineqarput.
AAMMA ATUARUK Kuannersuit pillugit innuttaasunut ataatsimiititsineq januaarip ulluisa 22-anni aallartissasoq
Jørgen T. Hammeken-Holm Aatsitassanut naalakkersuisoqarfimmi naalakkersuisoqarfimmut pisortaaneruvoq, coronavirusillu Danmarkimi tuniluutilertoqqinnera matumani pissutaasoq taassuma oqaatigaa.
Kalaallit Nunaanni innuttaasut Danmarkimut angalasut pilertornerpaamik angerlarnissaat Namminersorlutik Oqartussat sapaatip-akunnerata siuliani taamaammat kaammattuutigaat. Innuttaasut nunatsinnut angerlarnerat pissutaalluni coronavirusip Danmarkimi tuniluutilertortup nutaap nunatsinnut siaruaatilertornissaa ernummatigineqarsinnaasoq, naalakkersuisoqarfimmi pisortaaneq KNR-imut oqarpoq:
- Nappaatip tuniluutilertornissaa killilersimaarniarlugu innuttaasunik ataatsimiititsinissat nuunniarlugit februaarip aallartisimalaarneranut kinguartinneqarnissaat aalajangerparput, nunaqqativummi Danmarkimut angalasut amerlanersaasa nunatsinnut utersimanissaat, ullunilu tallimani angerlarsimaannaqqaarnissamut maleruaqqusat taamanikkussamut malissimassagaat naatsorsuutigaarput, Jørgen T. Hammeken-Holm oqarpoq.
Ulluliussat nutaat tassaapput februaarip 5-ianit 9-anut
Innuttaasunik ataatasimiititsinissat kinguarteqqinneqaratarsinnaanerat aamma sillimaffigineqartariaqartoq taanna oqarpoq.
- Taamaaratarsinnaavoq. Coronavirusimmi tuniluunnera pissutaalluni ataatsimiititsinissanut atatillugu angalanissat allanngoratarsinnaapput, Jørgen T. Hammeken-Holm oqarpoq.
Tusarniaanermut najoqqutassat tamanut saqqummersinneqareernerannut, Namminersorlutillu Oqartussat nittartagaanni tamanut ammasumik tusarniaassutigineqarnerannut atatillugu oqartussat tamanut ammasumik innuttaasunik ataatsimiititsiniarput.
Innuttaasut suliassamik saqqummiussivigineqarnissamik, tamatumalu kingorna suliassamik piginnittumut, oqartussanut aammalu aatsitassanut suliassaqarfimmi immikkut ilisimasalinnut arlaannaannulluunniit attuumassuteqanngitsunut apeqquteqarnissamut, nalunaarutiminnik tunniussinissamut il.il. periarfissinneqarnissaat siunertaralugu ataatsimiititsinerit aaqqissuunneqarput.
