Kalaallit Kuannersuit pillugit filmiliaat naatsuliaq, Finlandimi Tampere Film Festivalimi nersualaarneqartumi upernaaru takutinneqartussanngorpoq.

Filmiliaq "In the Shadow of the Tugtupite"-mik ateqarpoq, Inuk Jørgensenilu ilitsersuisuulluni.

- Filmiliama Tampere Film Festivalimi takutinneqarnissaa soorunami tulluusimaarutigeqaara. Europami festivalit annerit ilaanniippoq, assigiinngitsutigullu periarfissiivoq. Filmilianullu naatsunut festivaliuvoq, naatsuliornerlu nuannaartorivara, taamatullu periarfissinneqarnera nuannaarutigeqaara. Isumaqartorujussuuvoq, Inuk Jørgensen KNR-imut oqarpoq. 

AAMMA ATUARUK Jens Frederik Nielsen: Innuttaasut pillugit innuttaasunut ataatsimiititsinernut peqataanianngilagut

Narsap eqqaani Kuannersuarni aatsitassarsiornissamut pilersaarutit filmiliami naatsumi minutsinik arfinilinnik sivisutigisumi sammineqarput.

Inuk Jørgensen Narsamit aamma kingoqqisuuvoq, Kuannersuillu pillugit pilersaarutit malinnaavigalugit.

- Kuannersuit eqqarsaatigalugit nunatut inuiattullu kukkusumik aalajangiinissarput annilaanngatigisarpara. Inuit filmiliaq una tunngavigalugu eqqarsaatigilluakkamik aalajangiiumaartut neriuutigaara, Inuk Jørgensen oqarpoq.

AAMMA ATUARUK På gaden i Qaqortoq: Delte meninger om, hvorvidt møder skal udskydes

Filmi naatsuliaq nunani allani filmfestivalini kingorna aamma takutinneqareerpoq, Tampere Film Festivalimilu maanna tassa takutinneqartussanngorpoq. Filmiliat katillugit 6330-t akornanni 59-it Tampere Film Festivalimi takutinneqartussatut toqqarneqarput.

Tampere Film Festival ukioq manna marsip ulluisa qulingannit 14-iata tungaanut pisussatut pilersaarutigineqarpoq, coronalli ajornartoortitsinera pissutaalluni interneti aqqutigalugu pisussatut ukioq manna aaqqissuunneqarluni.