Kuannersuit eqqaat nunarsuarmi Thoriummeqarnersaavoq

Kuannersuit eqqaanni nuna nunarsuarmi Thoriumimik qinngornernik ulorianartulimmik nukipparujussuartalimmik peqarnersaavoq.

Thorium nunarsuarmi uuliamik pissamaatinit sinneruttunit tamarmiusunit nukissamik peqarneruvoq, taama oqaluttuarpoq nunap pissusaanut professori Henning Sørensen.

-Tamanna ungasinngitsukkut fysikimik paasisimasalimmut naatsorsortipparput, Kuannersuarniittorlu qularnaatsuuvoq, tassami nunarsuarmi uuliamit sinneruttumit pissamaatinit tamarmiusuminngarnit nukissaq annertunerummat. Tassa taama annertutigaaq, Henning Sørensen oqarpoq.

-Tusaannarlugu ingasalluinnarpoq, Kim Brejnholt aperaaq.

-Tassami ingasalluinnarpoq, kisitsisit uppernanngingajappulluunniit. Nunalu tamaaniittoq tamaat eqqarsaatigigaanni quleriaammik Thoriumeqarneruvoq, tassalu nukissat annertungaaramik eqqarsaatiginerluunniit ajornangajapput.

Thorium qaqugu nukissiuutinik pilersuinermi pingaaruteqarlualissanersoq kialuunniit ilisimanngilaa. Indiami tamanna massakkorpiaq thoriumimik reaktorit sanaartorneqarneratigut ilungersuutigineqarpoq, taamaattorli uranimik ullumikkutut atuinermut sanilliullugu atuinissaq tamanna akilersinnaalissappat suli teknikkikkut ajornartorsiutit aaqqinniagassaallutik. Taamaalissaqqaarporli, tassami Thoriumimi qinngornerit ulorianartut sakkukitsuuunerat pissutigalugu aalajangiisuusussat iluatinnaateqarput, Henning Sørensen oqarpoq.

-Aap, tassami suli peqartorujussuuvoq, aamma pitsaaquteqarpoq, pissutigalugu aqunneqarsinnaajunnaarluni ingerlalersinnaanngimmat aqunneqarsinnaallunili, nukissiorfissuit qaartoortissinnanagit qaartartunullu atorneqarsinnaanani. Eqqagassartai ulorianannginnerupput, soorlu plutoniumimik akoqaratik. Kiisalu suli ataatsimik pitsaaquteqarpoq, tassalu reaktorini uranimik suliaqaraanni, uranip 0,7 procentiinnaa kisimi qullorneqarsinnaammat, immaqalu uranip annerpaamik 1 procentia annerpaamillu 2 procentia. Thoriumili suli periarfissarissaarneruvoq, tassami naatsorsuinertigut 100 procentimik pissarsiviusinnaammat, ukiorpassuillu matuma siornagut misileraanerni 80 procentit sinnerlugit pissarsiviusarsimalluni, Henning Sørensen naggasiivoq.

Australiamiut ingerlatseqatigiiffiat Greenlands Minerals and Energy tassaavoq Kuannersuit eqqaanni misissuinissaminut akuersissuteqarfigineqartoq.