Kuannersuarni piiaavissaq siusinnerpaamik 2019-imi aallartissinnaassasoq
GME-p Kujataani Kuannersuarni piiaavimmik ammaanissaminik ukini arlalinni sulissutigaa. Suliniummilu sanaartornermi inuit 465-it sulisorinissaat piiaaviullu ingerlanneqarneranut inuit 380-it sulisorineqarnissaat tagginneqarsimavoq.
Aningaasaliissutissat akuersissullu suli amigaatigineqartut
Suliniutilli aningaasalersornissaa suli amigaatigineqarpoq minnerunngitsumillu aamma Namminersorlutik Oqartussanit piiaanissamut akuersissut amigaatigineqarluni. Tamannami nunatsinni oqartussaasunit suli naammassineqarsimanngilaq, matumatumalu saniatigut Naalakkersuisunngortut uranimut qummut killigititamik nutaamik aalajangersaasussaapput.
Tamakkulu piaarnerpaamik inissinneqarsinnaassappata aatsaat piiaavissaq aallartisarneqarsinnaassaaq.
- Sanaartorneq 2017-imi aallartissinnaanissaa piviusorsiornerpaavoq, tamannalu suliniummut aamma pitsaanerpaassasoq GME-p pisortaa, John Mair, oqarpoq, ilanngullugulu aamma oqaatigaa Kuannersuarni piiaavissap sanaartornissaa ukiunik marlunnik sivisussuseqassasoq.