Kuannersuarni aatsitassarsiorsinnaaneq suli eqqartorpaat
Nanortalimmi, Qaqortumi Narsamilu innuttaasunik ataatsimiititsinerit ornigarneqarluartut tamanna ersersippaat. Ataatsimiititsinerni Greenland Minerals and Energy-imit 2013-ip tungaanut pilersaarutit innuttaasunut saqqummiunneqarput.
Misissueqqaarnerit, misiliillunilu qillerinissat saniatigut, Kuannersuarni aatsitassarsiortoqalissagaluarpat peqqissutsimut avatangiisinullu kingunissai misissuiffigeqqissaarniarneqarput.
Pilersaarutip imminut akilersinnaanissaa, kiisalu ataqatigiinnermut aaqqissuussinerit sanaartornerillu, aamma nalilersorneqassapput. Nalunaarusiat inerneri Namminersorlutik Oqartussat Aatsitassanut Ikummatissanullu Pisortaqarfiannut saqqummiunneqassapput.
Taakkulu, nunani allamiut immikkut ilisimasallit suleqatigalugit, Kuannersuarni aatsitassarsiortoqalersinnaaneranik periarfissaqarnersoq isummerfigissavaat, Greenland Minerals and Energy-imit taama allapput.
Tamatuma saniatigut uranisiortoqannginnissaanik aamma aatsitassanik qinngornernik navianartunik akulinnik piiaasoqannginnissaanik aalajangersakkat Naalakkersuisunit aalajangiusimaneqassanersut apeqqutaalersoq, aatsitassarsioqatigiiffimmit allapput.
- Maannakkorpiarli nuannaarutigaarput, nunap ataani misissueqqissaarnissamut piumasaqaatit allanngortinneqarnerisigut, Kuannersuarni misissueqqaarnerit ingerlanneqarsinnaalermata.
Tamanna naammassineqarpat suliniut imminut akilersinnaassanersoq paasisaqarnerujussuussaagut, matumani eqqarsaatigalugit peqqinnissaq, avatangiisit aamma aningaasaqarneq, Greenland Minerals and Energy A/S naggasiivoq.
