Kræftip tinumasui paasiaarneqartartut
Ukioq 2010-mi arnat iviangimikkut kræftertut nassaarineqartut ukiup siulianiit 750-nik ikinnerupput.
Tassa ukiuni siuliini marlunni iviangimikkut kræftertut nassaarineqartartut amerleriapilooreerlutik ikileriarput.
- Kræftertut nassaarisarpassuavut nuannaarutigiinnarsinnaavarput, tassami toquunnartussarpassuugaluit uumaannarnissaanik tamanna kinguneqarmat. Iben Holten, Kræftens Bekæmpelsemi nakorsaanerusoq taama unnersiorpoq.
Iviangikkut qinnguartarneqarnissaq 2008-mili Danmarkimi neqeroorutaasalerpoq.
Ungasinngitsoq tikillugu iviangikkut qinnguartaasarnerit oqallisaangaatsiarsimapput, ilaatigut taamatut qinnguartaasarnerup kingunerisaanik arnat kræftip aallarniutaannaanik nassaarfigineqaraangata pisariaqavinngikkaluamik katsorsagaasarneri isorineqartarsimallutik.
Iviangikkut qinnguartaasarneq maani nunatsinni aamma oqallissutaarerpoq. Kalaallit Nunaannili peqatigiiffik Neriuffimmi siulittaasup Johanne Olsenip oqaaseqarnera malillugu Nunatsinni arnat Danmarkimiittunut naleqqiullugit immikkoortinneqarsimasorai, qallunaammi arnartaanut neqeroorut maani nunatsinni atuutinngimmat.
Nunatsinni ivianginik qinnguartaatissamik Peqatigiiffik Neriuffik Peqqinnissaqarfitsinnut ukioq 2009-mi tunissuteqarumasimagaluarput, qinnguartaatilli ingerlanneqarnissaanut aningaasartuutissarpassuit peqqutaatinneqarlutik itigartinneqarsimalluni.
- Danmarkimi neqeroorutaasartup assiganik pilersitsissagaluarutta arnat ukiumut 3.500-t qinnguartartneqarnissaanut neqeroorfigisassagaluarpavut. Taakkunannga arnat 20 procentii Nuummi najugaqarput, sinnerilu 80 procentit Nuup avataani najugaqartuullutik.
- Tassa misissugassat angallanneqarnissamut aningaasartuuterpassuussapput, misissuinerillu ingerlanneqarnissaanut pilersaarusiorneqarnissaasalu kingunerisaanik peqqinnissaqarfimmi atorfillit amerlanerujussuit pisariaqartinneqassallutik, Agathe Fontain februarimi tamanna pillugu taama oqaaseqarpoq.
Nunatsinni arnat katillugit 193-it iviangimikkut kræftilersimasut 1996-ip 2009-llu akornanni nassaarineqarput.
