Kræftimut akiuussutissaq atorneqalissanersoq isumaliutigaat
Arnat illissamik paavatigut kræfteqalersartut ukiualuit qaangiuppata ikilisinnaapput, akiuussutissat marluk ilisimatuunit neriulluarfigineqarmata. Kræftimik akiuussutissamik aatsaat siullerpaamik iluaqusiisussamik sanasoqarunarpoq.
Akiuussutissat illissap paavani taamaallaat kræfteqalernaveersaataasinnaapput. Virusi immikkut ittoq atoqatigiinnermilu tunillaanermi pinngortartoq matumani pineqarpoq, akiuussutissallu kræfteqalernissamut pinaveersimatitsisinnaapput. Nunatsinni arnanik 20-nit 70-it tungaannut ukiulinnik misissuisarnerit allaat pisariaarussinnaasut, Dronning Ingridip Napparsimmaviani nakorsaaneq Peder Kern naliliivoq.
- Akiuussutissarli meeqqanut qulinit aqqaneq-marlunnut ukiulinnut suli atoqateqarsimanngitsunut naatsorsuussaavoq, taamaattumik arnanik inersimasunik ukialunni suli misissuisoqartarallassaaq, Peter Kern erseqqissaavoq.
Nunatsinni arnat 1999-imit 2002-mut katillugit 28-t illissap paavani kræfteqalersimasutut nalunaarsorneqarsimapput. Arnat ukiumut agguaqatigiissillugu pingasut kræfteqarnertik toqqutigisarpaat, siornatigumut naleqqiullugu 40 %-imik ikinnerullutik.
- Nuna tamakkerlugu misissuisarnerit kræfteqalersartut ikilisimanerannut pissutaavoq. Peqqinnissaqarfimmik nakkutilliisoq Knud Brinkløv Jensen nassuiaavoq.
Danmarkimi kræftimut akiuiniaqatigiiffimmi Kræftens Bekæmpelsemi nakorsaaneq Susanne Krüger Kjær aamma oqarpoq, misileraanerit maannamut iluatsilluarsimasut.
- Akiuussutissalerneqarsimasut arlaannaalluunnit kræftinnguussinnaasumik nassaarfigineqarsimanngillat. Nassuiaavoq.
Aamma oqarpoq, akiuussutissaq ukiut marluk pingasulluunnit qaangiuppata tamanit atorneqarsinnaalissasoq. Akiuussutissap ineriartortinneqarnera Nunatsinnit soqutigalugu malinnaavigineqarluartoq, Peqqinnissaqarfimmik nakkutilliisoq Knud Brinkløv Jensen oqarpoq, akiuussutissarli arnanut qanoq annertutigisumik neqeroorutigineqassanersoq suli aalajangiunneqanngilaq.
