Kræftimik nappaatillit marloriaatinngorsimasut

Nunatsinni kræftimik nappaatillit ukiut 30-it ingerlaneranni marloriaammik amerlassusseqalersimapput. 1980-imi kræftimik nappaatillit 80-iusimapput 2008-mili 158-it kræftimik nappaateqartut paasineqarsimallutik.
Allattoq Gedion Storch
oktobarip 13-at 2011 06:37

Kræfti pullugu nassuiaat 2011 Peqqissutsimut Naalakkersuisoqarfiup paasisimasallillu allat suliaat saqqummerpoq.
Ineriartornerup peqqinnissaqarfik aningaasaqarnikkut ajornartorsioreersoq ajornartorsiornerulersippaa, kræfteqarnermummi misissueriaatsit nutaat atortorissaarutinik immikkut ittunik akisuunillu atortoqarluni immikkullu ilinniarsimasunik sulisoqarluni ingerlanneqartarmat, nassuiaammi tamanna ersersinneqartoq Atuagagdliutini taama allaaserinnittoqarpoq.
Kræftertut nunatsinniit Danmarkimut katsorsartikkiartorlutik aallartariaqartartut amerliartuinnassanngippata MR-scannerinik suussusersiiniarnermilu nipi tusarsaanngitsoq atorlugu atortunik nutarsaanissaq pisinissamullu aningaasaliinissaq sinerissami napparsimaviit pisariaqartikkaat, Atuagalliutit allaaserisaanni tamanna atuarneqarsinnaavoq.
Kræftimut akiuunneq inuiaqatigiinni unamillernartuusoq Peqqissutsimut Naalakkersuisoq Agathe Fontain nassuiaammi allappoq.
- Ullumikkut kræftimik nappaatillit ajorunnaartartut imaluunniit nappaammik atuillutik sivisunerusumik inuusartut siusinnersumit qujanartumik amerlanerujussuupput. Napparsimareernerulli kingorna pisinnaanngorsaqqinneqarnissamut pitsaanerusumik periarfissaqalernissaamut piumasaqaatissiivoq, Agathe Fontain erseqqissaavoq.
Kræfti pillugu nassuiaammi atuarneqarsinnaavoq nunatsinni kræfteqalersartut amerlanerpaartai suli puakkut kræfteqalersartut, angutini arnanilu.