Kræftimik nappaateqartut sivisunerusumik inuusalerput
Kræftimik akiuiniaqatigiiffimmiit kisitsisit kingulliit 2004-meersuugaluartut, misissuisup nakorsaanerup, Hans Stormip kræftimik nappaatillit sivisunerusumik inuusalernerat ersarinnerarpaa.
- Kræftimik nappaatillit ataatsimut isigalugit amerlanerusut peqqissillutik nappaateqarunnaartarnerat takussaanerulerpoq, Hans Storm oqarpoq. Kræftimik nappatillit katsorsarneqarnissaannut pilersaarusiaq, ukioq 2000-imeersoq naapertorlugu kræftimik nappaatillit siusinnerusukkut paasineqartalernissaat, pilataanerit katsorsaatillu pitsaanerulersinneqarnissaat kiisalu katsorsaasinnaasut immikkut ilisimasallit piginnaasallillu, napparsimavinnut ikinnerusunut katersorneqarnissaat siunniunneqarnikuuvoq, tamannalu pitsaasumik sunniuteqalinnguatsiarpoq. Assigiinngitsunimmi kræftimik nappaatillit pilattaanikkut ikiorsiiffigineqarsinnaasut, tassa angutit arnallu inalugarsuarmikkut, erlummikkut puammikkullu kræftertut kiisalu angutit nakasummikkut quullu aqqutaata qinersiatigut kræfteqalersartut nappaamminnik qaangiikkajunnerulerput. Taamatullu arnat iviangimmikkut, illissamikkut aammikkullu kræfteqartut nappaamminnik qaangiikkajunnerulersimapput. Aammikkut kræfteqalersartut pilattaanikkut katsorsarneqarsinnaanngimmata taakkua aamma amerlanerusut nappaamminnik qaangiisalernerisa takutippaat, pilattaanngikkaluarluni katsorsaanerit aamma iluaqutaanerulersimasut, nakorsaaneq Hans Storm oqarpoq.
