Kræftimik nappaateqarlutik toqusartut Kalaallit Nunaanni amerlanerpaapput

Taamaattoqarpoq Nunani Avannarlerni kræftip tungaatigut kinguarsimanerpaamut, Danmarkimut, sanilliullugu Kalaallit Nunaanni kræfteqalersartut affaannarmik amerlassuseqaraluartut.

Kisitsisit Nunani Avannarlerni Naatsorsueqqissaartarfiup ukiumoortumik saqqummersitaanit, Nunat Avannarliit Siunnersuisoqatigiiffianit saqqummersinneqartartumit pissarsiarineqarput.

Kræftimik 2004-mi toqquteqartut 115-iusimapput. Nalunaarsuusiaq kingullerpaaq tamanna Kalaallit Nunaanni kisitsisitigut paasissutissani 2007-imi ilanngunneqarsimavoq.

Kalaallit Nunaanni kræftimik toqquteqartut amerlassusaat 2005-imi kræfteqalersimasunut sanilliullugit maluginiarnarluinnartuuvoq. Tassami Nunat Avannarliit tamaasa eqqarsaatigalugit Kalaallit Nunaanni kræfteqalersartut ikinnerpaapput.

Tamatuma saniatigut Nunani Avannarlerni angutit arnallu akornanni kræftimik toqquteqartartut assigiinngissusilerujussuupput. Danmarkimi, Savalimmiuni Sverigemilu assigiinngissut arnat eqqarsaatigalugit 25-40 procentiuvoq.

Kalaallit Nunaanni kræfteqalersartut taama ikinnerutiginerat eqqarsaatigissagaanni kræftimik toqquteqartartut sooq taama amerlatiginerannut peqqinnissakkut nakkutilliisoq, Flemming Stenz, erseqqissumik akissutissaqanngilaq.

-Misissuisoqarsimanngilaq. Tamatumunnga pissutaasut arlaliusinnaapput. Kalaallit Nunaannilu angallannikkut pissutsit apeqqutaasorujussuunerat qularutissaanngitsoq, peqqinnissakkut nakkutilliisoq Atuagagdliutinut oqarpoq.