Kræftimik misileraatigalugu nakorsaasarneq periarfissaasariaqarpoq
Kræftimik nappaateqartut katsorsarneqarsinnaajunnaartutullu nalilerneqartut Danmarkimi misileraataasumik katsorsarneqarsinnaanissamut periarfissaqalernissaannik tassungalu atatillugu aningaasartuutit Peqqinnissaqarfimmit matussuserneqartarnissaannik neqerooruteqartalernissamut, Naalakkersuisut sulissutiginneqqullugit, Atassutip Inatsisartuni ilaasortaatitaannit siunnersuut Inatsisartuni ullumi oqaluuserineqarpoq.
Kræftimik nappaateqartut katsorsarneqarsinnaanngitsutullu nalilerneqarsimasut Danmarkimi misileraataasumik katsorsarneqarsinnaanissamut periarfissaqartitaanissaannik tassungalu atatillugu angalanermut, najugaqarnermut nerisaqarnermullu aningaasartuutinut Peqqinnissaqarfiup matussusiisarnissaanik Naalakkersuisut sulissutiginneqqullugit Atassutip Inatsisartuni ilaasortaatitai siunnersuuteqarput, siunnersuutaatalu aappassaaneerneqartigani Inatsisartut Peqqissutsimut Ataatsimiititaliaannut ingerlateqqinneqassasoq, Naalakkersuisut Inatsisartunilu partiit tamarmik innersuussuteqarput.
Danmarkimi kræfteqalersimasut katsorsarneqarsinnaajunnaartutullu nalilerneqarsimasut misileraataasumik akeqanngitsumillu katsorsarneqarnissamut periarfissaqalernikkuupput, taamaattumillu nunatsinni tamanna aamma periarfissaasariaqartoq, Godmand Rasmussen Atassut sinnerlugu ilaatigut taama oqariartuuteqarpoq.
Atassummut akissuteqarluni Peqqissutsimut Naalakkersuisup Agathe Fontainip erseqqissaatigaa taama periarfissiisoqassappat misissuilluaqqaartoqarnissaa pisariaqassasoq.
-Misileraataasumik katsorsaanerit pineqartillugit pissutsit arlallit qularnaarneqarsimasariaqarput. Misileraaneq aamma assigiinngitsunik sunniutipiloqarsinnaasarpoq, ajornerpaamillu pisoqassappat ajoqusiiginarsinnaalluni, Agathe Fontain akissuteqarpoq. Misileraataasumik katsorsaanermut aningaasartuutaasinnaasut aamma ilisimaneqartariaqarmata siunnersuutigineqartup aappassaaneerneqartigani Peqqissutsimut Ataatsimiititaliamut ingerlateqqaarneqarnissaa Agathe Fontainip inassutigaa.
