Kræftimik akiuiniarnermi kalaallit ilaanissaat pingaartippaa
Danmarkimi naalakkersuisut kræfti akiorniarlugu qaammat kingulleq ukiuni tulliuttuni sisamani suliniutissatut isumaqatigiissutaat, 810 millioni koruuninik aningaasartaqartoq, qanoq ililluni Kalaallit Nunaannut annertunerpaamik iluqutaasinnaanersoq folketingimut ilaasortaq, Lars-Emil Johansen, Siumut, danskit peqqinnissamut ministeriannut, Bertil Haarderimut apeqquteqaatigaa.
Lars-Emil Johansenip apeqquteqaatini pillugit ima oqarpoq:
- Danmarkimi naalakkersuisut kræftertunik katsorsaanermut iliuuserisartakkatik annertusillugit maannakkut iliuuseqarnialermata, tamakku qanoq Kalaallit Nunaannut iluaqutaasinnaanersut paaserusuppara.
Lars-Emil Johansenip paaserusuppaa kræfti pillugu suliniut tamakkiisumik imalunniit annerpaamik qanoq ililluni Kalaallit Nunaannut atuutsinneqalersinnaanersoq, tamannalu qanoq akeqassanersoq.
-Kalaallit Nunaarmiut tamatta ilanngutsinneqassagaluarutta kræftimik suliniummut nutaamut qanoq tamanna anngaasatigut naleqassanersoq paaserusullugu. Isumaqarpunga folketingimut ilaasortatut suliassama ilagigaat periarfissanik ujartuinissaq.
Lars-Emil Johansenip oqaatigaa danskit peqqinnissamut ministeriat Bertel Haarder saaffiginnissummut soqutiginnilluartoq, taamattumillu suleqatigiissutigineqarsinnaasut pillugit isumalluarluni.
- Bertel Haarder, maligisinnaasakka najoqqutaralugit soqutiginnippoq, allaat oqarluni akissutisiakka naammaginngikkukkit oqaloqatigeeqqinnissamut periarfissaqartoq, Lars-Emil Johansen oqarpoq.