Kræfti pillugu pilersaarut nutaaq ukiaru saqqummiunneqassaaq
Peqqissutsimut naalakkersuisoq, Steen Lynge, tusagassiortunik ippassaq katersortitsimmat tamanna paasinarsivoq.
- Kræfti pillugu pilersaarut sutigut sipaaruteqartoqarsinnaaneranut aammali kiffartuussinikkut pitsanngorsaatissanut siunnersuutinik imaqarpoq, Peqqissutsimut naalakkersuisoq, Steen Lynge, oqarpoq.
Naalakkersuisut siuliisa kræfti pillugu nassuiaataat 2011-meersoq naapertorlugu, piffissami 1980-imit 2008-mut nunatsinni kræftimik eqqugaasartut ukiumut amerlassusaat marloriaatinngungajassimapput.
1980-imi kræftimik eqqugaasut 80-iupput, 2008-milu 158-iullutik.
Pilersaarutissami aningaasatigut sipaarutissat, nukiit sumiiffimmut ataatsimut katersornerisigut nassaariniarneqarput, soorlu ass. napparsimasut pilatsissagaangata.
Nunatsinni peqqinnissaqarfiup katsorsaanissamut neqeroorutit Københavnimiittut misissussavai, tassanimi immikkut ilisimallit amerlanersaapput kalaallillu nakorsiartut angerlarsimaffiat tassani inissisimareerluni.
Kalaallit napparsimasut, sumiiffimmi ataatsimi suliaritinniartut katersornerisigut, pitsaanerpaamik katsorsaasoqarnissaa aamma qulakkeerneqassaaq, Steen Lynge isumaqarpoq.
- Ikiumut pilaanerit pingasuinnaat ingerlattarukkiit, taava kukkunissamut qaninnerussaatit imaluunniit pilaaneq sivisunerussalluni. Pilaanerilli 100-ppata, taava qanoq iliussanerlutik ilisimaqqissaassavat, Peqqissutsimut naalakkersuisoq oqarpoq.
Kræfti pillugu pilersaarutip ingerlanneratigut peqqinnissaqarfik aningaasanik qanoq amerlatigisunik sipaaruteqarsinnaanersoq suli ilisimaneqaqqissaanngilaq.
- Naagga, suli kisitsisitalersuinngilagut, Steen Lynge KNR-imut oqarpoq.
Kræfti pillugu pilersaarutissami aamma siunnersuutigineqarpoq kræftimik katsorsarneqarsinnaanngitsumik eqqugaasimasut, ilaquttatik qaninnerit najorlugit eqqissinissaat siunertaralugu Nunatsinniittassasut.
