Kræfti iliuuseqarfigeqqullugu tupersuarmik nappaasut
Peqatigiiffik Neriuffik Nuuk aamma Kræfteqartunut ilaqutaasut peqatigiiffiat NNN 2008 (Nunarsuaq Nunarsuutillugu Napparsimasoqartuassaaq) peqatigiillutik Namminersornerullutik Oqartussat saanni tuperput, nerrivinnik issiavinnillu piareersaasimallutik.
- Inatsisartut oqaluuserisussaagaluaramikku nappaat kræfti, ilaqutaasullu Danmarkimut aallartinneqartartut napparsimasut ingerlaqatiginiarlugit qanoq ajornartorsiuteqartarnersut, Susanne Kreutzmann Malmros Nuummi Neriuffimmi siulittaasoq aaqqissueqataasorlu oqarpoq.
- Takutinniarparput Danmarkiliartoqaraangat inissaaleqisarnersuaq, oqarpoq.
Neriuffimmiit NNN 2008-miillu suleqatigiillutik napparsimasut ilaqutaalu erseqqissumik paasitinneqartarlernissaat anguniarusuppaat.
- Ilaqutaasut iluamik nalunaarfigineqarneq-ajorput, qanoq sivisutigisumik Danmarkimi ineqartinneqarsinnaanersut. Danmarkimut aatsaat pigaangata ilisimatinneqartarput ulluni pingasuinnarni inissaqartinneqarlutik.
Susanne Kreutzmann Malmros aamma oqarpoq ilaqutaasut napparsimasup ullorparpassuarni misissugariteriarluni suliaritittussanngoraangat sivisunerusumik uninngassalluni, napparsimasumik ilaqutaasumillu nooqattaartitsineq aallartittartoq.
- Nooqattaartitsinerup pinaveersaarnissaa inatsisartunut tapersersorneqarniassagatta oqariartuutigaarput. Ullaarli manna aatsaat ilisimatinneqarpugut oqaluuserisassaq ukiamut kinguartinneqarsimasoq, kisianni tamaaniiginnarniarpugut kinguartitsigaluartut.
Susanne Kreutzmann Malmros suleqataalu ualeq tamaat aamma inatsisartut ataatsimiittarfiata saani kræfti pillugu paasisitsiniaatiginiarput.
Inatsisartuni oqaluuserisassat kræftimut tunngasut upernaaq manna marluupput, aappaa napparsimasut nunani allani katsorsarneqartarnerannut immikkut 7,9 mio. koruuninik aningaasaliinermut tunngasoq naammassineqareerpoq.
Oqaluuserisap aappaa napparsimasut ilaqutaasa napparsimasumut ingiaqataatillutik Danmarkimi najugaqarfissaannik pilersitsinissamut tunngasoq ukiaru nanginneqassaaq.
