Nunatsinni kræftertut Dronning Ingrid-ip napparsimaviani suliarineqartarfissaanut immikkoortortassaq ullumi atoqqaartinneqassavoq.
Kemoterapimik suliaritissinnaaneq septemberip aallaqqaataani ingerlanneqarsinnaalerpoq, ullumilu immikkoortortaq pisortatigoortumik atoqqaartinneqassalluni.
Napparsimavimmi suliaqarpallaarneq pissutigalugu nalornissutigineqarleraluarpoq taamaaliornissamut piareersimasoqarnersoq. Aasap ingerlanerani immikkoortoq A2-mi ima ulappussimatigipput, suliarineqartussat sulisunut ulapputtunut naammagittaalliortarlutik.
Napparsimavissuarmilu pisortaq Jens Møller Jensen oqarpoq, tamanna piffissami pisimasoq, kræftertullu naammaginartumik suliarineqartarnissaat naatsorsuutigineqartariaqartoq.
Immikkoortortamut nutaamut peqqissaasut sisamat atorfinitsinneqarsimapput, piffissallu takutissavaa taakua naammassanersut.