Kræftersimasoq: - Iviangit nunatsinni mammografimik misissorneqarsinnaasariaqarput

Neriuffiit Kattuffiata siulittaasua Johanne Olsen aamma Inger Dahl isumaqarput mammografimik misissuisoqartalerpat,  tamanna nappaammik paasinniaarnermik kinguneqarsinnaasoq.

- Ilisimavara arnarpassuit toqqissisimasutigineq ajoraat iviangimikkut tinusoqarsimallutik peersiffigineqartarnertik. Peerneqartormi Danmarkimi aatsaat misissorneqareeraangat kræfteqarnersoq kræfteqannginnersorluunniit paasineqarsinnaasarpoq, Inger Dahl ukiut pingasut matuma siorna iviangeersittoq oqaluttuarpoq.

Inger Dahlil isumaqarpoq ataavartumik, soorlu ukioq allortarlugu mammografimik misissuisoqartartuuppat toqqissisimanarnerulisssagaluartoq, mammografimik misissorneqarsimatilluni paasiaarneqarsinnaassammat kræfteqarnerluni kræfteqannginnerluniluunniit.

Immikkoortitsineq
Neriuffiit kattuffiata siulittaasua Johanne Olsen isumaqarpoq nunatsinni arnat Danmarkisuulli mammografimik misissortinneqarneq ajormata, tamanna immikkoortitsinertut isigineqarsinnaasoq.

Danmarkimi arnat 50-leereersimasut iviangitik kræftimut tarrarsortillugit ukioq allortarlugu  misissortissinnaasarpaat, atortumik mammografiimik pineqartartumik. Nunatsinnili taamaattumik atortoqanngilaq.

- Nunatsinni arnat iviangitik Danmarkimisulli misissortissinnaasariaqarpaat, Johanne Olsen, Neriuffiit kattuffiata siulittaasua oqarpoq.

Arnaq iviangimigut tinusoqarsimalluni nakorsiartoq, misissortinnerminiillu uppernarsillugu tinusoqarsimaneranik paasisaqarfigineqartoq, nakorsiarfigineqartumi ultralydimik misissortinneqarsinnaasarpoq. Ultralydemilli misissuineq qularnaavillugu suussusiisinnaaneq ajorpoq. Nunatsinni mammografi misissuutigineqarneq ajorpoq, taama kræfti pillugu nassuiaammi,  siorna saqqummersumi allassimasoqarpoq.

Johanne Olsen, Neriuffiit kattuffiata siulittaasua isumaqarpoq mammografimik misissuuteqalertuuppat arnat ukioq allortarlugu misissortittalernermikkut tamanna toqqissisimatigilissagaat.

Kalaallit arnat ivingiangimikkut kræftertut 1996-mit 2009-mut 193-upput.