Kræfteqartut annaanneqarnissaannut suliniutit ataqatigiissaarneqassapput
Kalaallit niaqqumikkut iggissamikkullu kræfteqarlutik toqusartut danskinut taama nappaatilinnut naleqqiullugit amerlanerusut, Rigshopitalimi misissuinerup takuteqqammerpaa. Juuli qiteqquttoq nutaarsiassatut tusartitarput taanna Rigshospitalimi misissuisimasumit Ramon Gordon Jensenimit suliaavoq.
Kræftimik nappaateqartut Nunatsinni kingusinaartumik paasineqartarnerat oqaatigaa.
Katsorsartinneq kræfteqartut Københavnimi Rigshospitalimi immikkoortortaanni pisassaaq. Kalaallit Nunaanni kræfteqartut Dronning Ingridip Napparsimmavissuani ukiumut arlaleriarlutik misissortittarput, siutillu nakorsaannut sinerissami angalasartumut ukiumut ataasiarlutik misissortittarlutik.
Napparsimasut nappaatip suussusianik Dronning Ingridip Napparsimmavissuani paasitinneqaraangamik qinnguartartillutik katsorsarneqarnermik nalaani qinnguartartereerunillu sunik nerisaqarnissaminnik tamakkuninnga ilisimasalimmik oqaloqateqarnissaminnut periarfissinneqartarput. Kukkusumik nerisaqarnissaat tamatumani pinaveersaartinneqartarpoq.
- Sulili pitsanngorsaasinnaavugut, Susanne Brofeldt oqarpoq, erseqqissaatigalugulu inuppassuit napparsimanerminni qinnguartartereernermillu kingorna nakorsaatit saniatigut sunniuteqarnissaasa pinngitsoortinnissaat pikkoriffigisorujussuugaat.
Kræftimilli toqquteqartartut katsorsartereernerulluunniit kingorna toqquteqartartut ikilisarneqarnissaannut aqqut suli takeqaaq, Susanne Brofeldt oqarpoq.