Krusep akiligassaqarsimaneq ”akueriumanngilaa”

Inatsisartut kukkunersiuinermut ataatsimiititaliaat Aleqa Hammondip aningaasanik atuisimanera pillugu tamanut ammasumik tallimanngormat unnukkut kingusissukkut isornartorsiuereersorlu, Siumumi aalassassimaartoqarpoq.
septembarip 28-at 2014 14:28

Inatsisartut kukkunersiuinermut ataatsimiititaliaat Aleqa Hammondip aningaasanik atuisimanera pillugu tamanut ammasumik tallimanngormat unnukkut kingusissukkut isornartorsiuereersorlu, Siumumi aalassassimaartoqarpoq. 

Siumup politikkikkut oqaaseqartartua Karl-Kristian Kruse allappoq, politikerit Nunatta karsianit aningaasanik atuisarsimanerat aatsaallu ukiup ataatsip qaangiunneratigut piffissalluunniit sivisunerusup qaangiunneratigut aatsaat akiliisarsimanerat akuerineqarsinnaanngitsoq.

- Siumup Inatsisartuni ilaasortaatitaasa Naalakkersuisut Siulittaasuata Aleqa Hammondip Namminersorlutik Oqartussanut akiligassaqarsimanera akuersaanngilluinnarpaat, Karl-Kristian Kruse allappoq, nangillunilu:

- Taama pisoqaqqinnginnissaa sakkortuumik inassutigaarput.

Qaasuitsup Kommuniani Siumup kommunalbestyrelsimut ilaasortaatitaani siulittaasoq Palle Jeremiassen sakkortusaannginneruvoq.

Taassuma aallarniutigalugu qinersisoqartariaqarneranik oqaluttoqarnera akuersaanngilaa.

- Naalakkersuinikkut anguniakkat piviusunngortinniarlugit suliniutit iluatinnaqaat unitsinneqartariaqaratillu, soorlu aalisarnikkut politikki nunaqavissunut iluaqutaasumik ingerlalereersoq ingerlateqqinneqartariaqarpoq  aamma sanaartugassat sinerissamut siammartinniarneqarnerat ingerlaannartariaqarpoq, Palle Jeremiassen allappoq.

- Naalakkersuinikkut ilungersunartorsiorneq qinersisitsinermik kinguneqassanngitsoq neriuutigaara, taanna allappoq.

Kommunalbestyrelsimili ilaasortap taassuma Inatsisartut kukkunersiuinermut ataatsimiititaliaata sulinera tapersersorpaa, ajortoqarsimappat kinguneqartitsinissaq saneqqunneqarsinnaanngilaq, aamma Naalakkersuisuusimasunut tamanut, Palle Jeremiassen allappoq.

Partiimili oqaaseqartut sakkortuumik oqaaseqaraluartut kinguneqartitsinissaq oqallinnermi maannamut tunuarsimaarfigineqarpoq. Isummersuutit tassaanerullutik Inatsisartut kukkunersiuinermut ataatsimiititaliaata misissueqqinneranit qanoq paasisaqartoqarnissaa isummernissamut utaqqimaarusunneqarluni.