VIDEO Kruse Sisimiuni saarullilerineq pillugu sulipallattoq
KNAPK-p immikoortortaa naapertorlugu Sisimiut imartaanni saarullinnik ulikkaarpoq. Tunisinermulli periarfissat killeqarput, tamannalu Sisimiuni aalisartunit naammagittaalliutigineqarpoq. Sisimiuni aalisartut piniartullu peqatigiiffianni umiarsualivimmi assersueriaannaallutik siorasaaripput.
Aamma atuaruk Sisimiuni aalisartut umiarsualivimmik assersuinissamut piareeqqapput
Tunisinermimi akit ima appasitsigaat, allaat saarullik niaqueriingaq kilomut 5,50 kr.-eqarluni, taamaammallu saarullinniarnisssaq imminut akilersinnaanngitsoq, Leif Fontaine SAPP tunuliaqutigalugu oqarpoq.
Akit taama appasitsigitillugit aalisartut akiligassanut allanut akissaqangitsut, Leif Fontaine oqarpoq. Naak aalisartut saarullinnik ulikkaarneraagaluartut Royal Greenlandimut tunisinissaq killeqarpoq. Angallatit angisuut ulloq allortarlugu taamaallaat 2.000 kg.-nik tunisisinnaatitaapput, umiatsiallu mikinerit 400 kg.-inik tunisisinnaatitaallutik.
Naalakkersuisut suliaq ingerlakkaat
Karl Kristian Kruse naapertorlugu, Naalakkersuisut umiarsuarmut tunitsivimmut akuersinissamik aallaaveqartumik qinnuteqaammik suliaqarput.
-Umiarsualiinissamut tunngatillugu sulianik Naalakkersuisunut qaqitsinikuuvugut. Malittarisassalli ullumikkut atuuttut aallaavigalugit qinnuteqaat akuerineqarsimanngilaq. Tamatumalu utertinneqarnerata malitsigisaanik aalisarneq pillugu siunnersuisooqatigiinnut allannguuteqartitsisoqarnissaanik siunertaqartumik nassitsinikuuvugut, neriuppungalu piaartumik tamanna naammassisinnaassagipput.
Karl Kristian Krusep atorfilittani nukinginnartumik suliaqartippai, taakkualu suliaq naammassippassuk, Naalakkersuisut ilaliisinnaanerat apeqqutaassasoq KNR-imut oqaatigaa.
