Kruse: Kapisilinnik tunisassiorfinnik tunisisinnaaneq ammaqqissinnaasaaq
Naalakkersuisut kapisilinnik tunitsivinnut tuniniaasoqasinnaajunnaarnerannik aalajangernerat KNAPK-miit Aalisarneq pillugu Siunnersuisoqatigiiniillu isornartorsiorneqarpoq.
Naalakkersuisut aamma tunisisoqannginnissaanik aal.ajangernerminni tunngavilersuutaannik, siunnersuisoqatigiit aallisartullu sinniisaat ujartuippput. Aalisarnermut naalakkersuisoqarfimmi pisortap Jørgen Isak Olsen aalajangiineq sumik peqquteqarnersoq nassuiaassinnaanngikkaa, sisamanngornermi oqaluttuaraarput Aalisartut amerlavallaarnerat pisassallu ikippallaarnerat aalajangernermut tunngaviusut Aalisarnermut naalakkersuisoq Karl-Kristian Kruse KNR-mut maanna oqarpoq.
Aamma atuaruk Siunnersuisoqatigiit tunitsivinni kapisileqaleqqinnissaanik kissaateqarput
-Nunatsinni aalisarnermut piniarnermullu inuussutissarsiutigalugu allagartallit aamma tapertaralugu allagartallit, ullumi 5206-iusut tamarmik massakkut kapisilinniarsinnaanissaminnut periarfissaqarput. Taannalu aallaavigalugu, pisarisinnaasaat agguaqatigiisikkaanni ataatsimut 8 kilot sinneqalaarput. Taamaattoq nammineq pilersornissamut tunngatillugu inuit namminneq atugassaat salliutinneqarlutik aalajangiineq pisimavoq, aalisarnermut naalakkersuisoq Karl-Kristian Kruse taama oqarpoq.
Kapisilinnik tunitsivinnut tunisisinnaannginneq kapisilinniartarneq pillugu pilersaarutimmut, naalakkersuisut aggustimili atuutilersinaannut ilaavoq. Kisianni aamma ukiut siuliini pisassiissutit ikinnerugaluartut, tunitsivinnut tunisisoqarsinnaavoq.
- Ukiuni siuliini piniarsinnaanermik akuersissutit atorlugit, taakku tunitsivinnut tunitsitsinerit ingerlanneqartarsimapput. Kisianni massakkut allagartat, tapertaralugu aammalu inuussutissarsiutigalugu allagartalinnut tamanut periarfissiissutigineqarnera ingerlassanersoq takoqqaariarlugit nalilersuinerit tikeqqinneqarsinnaassapput, Karl-Kristian Kruse oqarpoq.
Aamma atuaruk Royal Greenlandip KNAPK paasitippaa
Tassalu aalajangerneq allanngortinneqarsinnaasoq naalakkersuisut oqarput.
Tamannali aatsaat septemberimi, qanoq kapisilittoqartigisimanera takoqqaarlugu pissaaq.
-Kapisilinniarnerup ingerlanera qanoq sukkatigisumik ingerlanersoq, imaluunniit pisassatut aallaaviusut arriitsumik ingerlanersut takoreerutsigit, kingusinnerusukkut nalilerumaarparput tunitsivinnut tunisisoqaleqqissinnaassanersoq, aalisarnermut naalakkersuisoq Karl-Kristian Kruse taama oqarpoq.
KNAPK-p nalunaarfigineqarsimannginnera, aalisarnermullu naalakkersuisoqarfimmi pisortap Jørgen Isak Olsen aalajangiinermut ilisimasaqannginnera, naalakkersuisup oqaasissaqarfiginnginnerarpaa.
Paarnaq Hansen Ivik Kristiansenilu taama ilanngutassiorput.
