Kruse: Avaleraasartoorniarnermi nunaqavissut salliutinneqassapput
- Nunatsinni ingerlatseqatigiiffinnut namminneerlutik kilisaataatilinnut aalisariutaatilinnullu Naalakkersuisut aalisakkanik pisassiisarnerminni salliutitsisasassallutik politikkeqarput. Tamanna ukioq manna avaleraasartoorniarnissami allaanerussuteqarnavianngilaq, Aalisarnermut, Piniarnermut Nunalerinermullu Naalakkersuisoq Karl-Kristian Kruse ilaatigut allaaserisaqarpoq.
Taanna KNAPK-mik marlunngormat januaarip ulluisa 27-anni ataatsimeeqateqarpoq. Avaleraasartoortassat pisassiissutigineqassatillugit nunaqavissut salliutinneqartarnissaat KNAPK-mit Naalakkersuisumut erseqqissaassutigineqarpoq.
Saarullittassat amerlineqarnissaat kissaatigineqartoq
Avaleraasartoorniarnissamut qinnuteqarsimasut pillugit qanoq pingaarnersiuisoqassanersoq qanittukkut ilisimatitsissutigineqarumaartoq, Karl-Kristian Krusep KNAPK-mut ilisimatitsissutigaa, siornalu qinnuteqarsimasut pingasunngorlugit pingaarnersiugaassapput:
Kalaallit aalisariutaataat salliutinneqassapput, aalisariutilluunniit Nunatsinneersunit inuttalerlugit attartorsinnaallutik. Tulliulluni kilisaataatillit kilisaatiminnik aalisartitsisut aalisariummik attartorlutik aalisartitsisinnaallutik, pingajuattullu ingerlatseqatigiiffiit kilisaataateqanngitsut.
Sinerissap qanittuani saarullittassat 40.000 tonsinut amerlineqarnissaat KNAPK-p avaleraasartoortassat saniatigut kissaatigaa.
