Kronprinsesse Mary: Meeqqatta prinsetut prinsessetullu taaguutaat isumaliutiginikuuagut
Prins Joachimip meeraasa prinsitut prinsessetullu taaguutaasa atorunnaarsinneqarnissaanik Dronning Margrethe aalajangersimanera pillugu kunngissap nulia Mary ullumi tallimanngornermi oqaaseqarpoq.
Tamannalu pivoq Københavnemi illorsuarmi saqqummersitsiviusartumi Øksnehallenmi.
Mary oqaluttuarpoq, tamanna kunngissarlu isumaliutigisarsimallugu.
- Meeqqatta prinsetut prinsessetullu taaguutaasa allanngortinneqarnissaannut piffissanngorpat isumaliutigisussaavarput
Kunngissakkut meeraasa tassalu prins Christiaap, prinsesse Isabellap, prins Vincentip kiisalu prinsessse Josephinap prinsetut prinsessetullu taaguutaat atorunnaarsinneqassanersut Maryp akisinnaanngilaa.
- Prins Christiaat kunnginngorpat kunnginngornissaaluunniit qanillippat, kunngikkormiut qanoq inissisimanissaat ullumikkut naluarput, kunngissap nulia Mary taama oqarpoq.
- Allannguineq ajornartorujussuusinnaavoq annernarlunilu, amerlanerit tamanna misilinnikuuaat, Mary oqarpoq.
Prins Joachimip meerai aappaagu jannuaarip ulluisa aallaqqaataani prinsetut prinsessetullu taaguuteqarunnaassasut kunngikkormiunit pisortatigoortumik pingasunngormat saqqummiunneqarpoq.
Prins Joachim sisamanik meeraqarpoq. Angajulliit marluk prins Nikolaj aamma Prins Felix, taakkua grevinde Alexandralu meeraraat. Prinsesse Athena aamma Prins Henrik taakkua prinsesse Marie lu meeraraat.
Prinsetut prinsessetullu taaguuteqarunnaarnissaannik aalajangerneq Prins Joachimip, grevinde Alexandrap prins Nikkulaallu paasiuminaatsillugu qisuariarput.
23-nik ukiullip prins Nikkulaap aanami tassalu Dronning Margrethep aalajangernera paasiuminaatsillugu sisamanngornermi oqarpoq.
