Kronprinsesse Mary atuakkamik kalaallisut allassimasumik saqqummersitseqataavoq
Atuakkami sammineqarpoq angerlarsimaffinni persuttaasarneq, atuagaq taaguuteqarpoq Soorlu Ilumoortoq. Angerlarsimaffinni persuttaasarnerit meeqqap nammineerluni misigisimasai aallavigalugit atuagaq allanneqarpoq. Atuakkap saqqummersinniarneqarnerani atuakkiortut kalaallit atuakkanillu ilusilersuisartut kalaallit suleqatigineqarput.
Atuagaq Soorlu Ilumoortoq Kalaallit Nunaanni arnat qimarnguiinut, ulloq unnuarlu meeqqat angerlarsimaffiinut atuarfinnullu nassiussuunneqarpoq.
Inersimasut meeqqallu tamarmik imminnut ajunngitsumik pinissaat aningasaateqarfimmi Mary Fonden-imi suliniutigaarput, taamaattumik atuakkap taassumap saqqummersinneqarnissaanut isumassarsisimavugut, Kronprinsesse Mary atuakkap Soorlu Ilumoortup siulequtsiilluni allakkamini taamatut allappoq. Meeqqat ajornartorsiuteqarunik tamanna kisimiillutik pigissanngikkaat atuakkami oqaluttuarineqarpoq, angajoqqaat imminnut persuttaattarnerat pissusissamisoortuunngitsoq oqaluttuarineqarpoq minnerunngitsumillu angajoqqaat meeqqaminnik attuisassanngitsut atuakkami oqaluttuarineqarluni, Kronprinsesse Mary atuakkami Soorlu Ilumoortoq-mi siulequtsiilluni taamatut allappoq. Atuakkap assiliartalersorneqarnerani, suleqataapput assilialiortartoq Julie Edel Hardenberg, ilulisersuisartoq Christian Rex eqqummiitsuliortoq Niels Motzfeldt titartaasartorlu grafiker Jette Brandt atuakkap suliarineqarnerani suleqataapput. Atuagaq tarnip pissusaanik immikkut ilisimasalimmit Connie Gregersenimit allanneqarpoq, suleqatigineqarlutik perorsaasoq /ilinniartitsisoq Naussúnnguaq Lyberth aammalu tarnip pissusaanik immikkut ilisimasalik Amalie Lynge Pedersen.
