Kronprins Frederik oqaluffimmut atsiunneqalerpoq
Kunngissaq Frederik Australiami oqaluffimmut atsiunneqarnialerpoq. Nalliuttorsiornermi, oktobarip ulluisa 14-ianni, aqaguagu, kunngissaq nammineq peqataassaaq. Sydneymi danskit oqaluffiat ateqalissaaq "Frederikskirken".
Oqaluffiup atissaa, Dronning Margrethep, oqaluffimmut illersuisuusup, akuersissutigereerpaa.
Danmarkimi Thistedimi Oqaluffiup nukappiaqqat-angutillu erinarsortartuisa Australiami angalanertik sivitsorlugu nalliuttorsiornermi aliikkusersuissapput. Taakku angalanerannut kunngissap nulia, Mary, illersuisuuvoq. Danmarks Raduiop nittartagaani tamanna allaaserineqarpoq.