KRK Nuuk Filippinerinut ikiuiniarluni tunissuteqarpoq
Immikkoortortami marlunngormat ataatsimiittoqarnerani aalajangerneqarpoq eqqugaasunut 50.000 koruuninik tunissuteqartoqassasoq.
Peqatigisaanillu immikkoortortap Danmarkimi Røde Korsimut noqqaassutigisimavaa ilaqutariit meerartallit eqqugaasimasut imermik minguitsumik pissarsissunnissaannut aningaasat atorneqassasut.
Kalaallit Røde Korsiata Nuummi immikkoortortaata aningaasanik tunissutai, Immikkoortortap atornikuerniarfiata Nuup qeqqaniittup sinneqartoorutaaneersuupput.
Tassanilu Filippinerit ilisarisimaneqarluarput, Filippinerimmi Nuummut nuussimasut ilarpassui atornikuerniarfimmut pisiniartartuupput.
Filippinerillu pisiniarfimmut akiliutigisarsimasaat maanna nunaannut ajunaanersuaqarfiusumut utertinneqartussanngorput, tamannalu ajunngilluinnartutut oqaatigisariaqarpoq.
Kalaallit røde Korsiata nuna tamakkerlugu siulersuisui ullumi sisamanngornermi novembarip 14-iani aalajangerput Filippinerini eqqugaasunut 50.000 koruuninik tunissuteqarniarlugit, taamaasillunilu Nunatsinni ikiuiniutitut tunissutigineqartut maanna 100.000 koruuninngorput.