KRK ilaqutariinnut meerartalinnut pissakitsunut juullimi ikiuutissanik agguaassissaaq

Juulli innuttaasut amerlanersaannut tassaavoq tunissutissaqarluni, mamartunik nerisassaqarluni ikinngutigilluakkallu peqatigalugit nuannaffik, innuttaasunulli amerliartuinnartunut juulli nuannaarutaajunnaariartuinnarpoq. Tunissutissanut, nerisassanut mamakujunnullu aningaasartuutit amerlasuupilussuusarput juullilu nuannaffiujunnaartillugu nuanniitsunngortittarlugu.
Allattoq Peter Troelsen, Simon Uldum
decembarip 07-at 2012 12:22

Qujanartumilli ilaqutariinnut meerartalinnut pissakinnerpaanut ikiortissamik aallerfissaqarpoq, taamaasillutillu meeqqatik juullimi tunissutissaqartillugillu mamartunik nerisassaqartissinnaassallugit. Kalaallit Røde Korsiat Nuummi Ilulissanilu ilaqutariinnut meerartalinnut juullimi ikiuutissanik agguaassisiniarpoq.

-Nuuk Ugeavisimi allagarsiisoqareerneratigut inuit 103-t juullimi ikiuutissanik tunineqarnissamik qinnuteqaateqarsimapput. Taakkunannga 69-it piumasaqaatit naammassivaat gavekortimillu Atornikuerniarfimmut pingasunngorpat aallersinnaallutik. Tunineqartussanik toqqaaniarnermi, ukiumut isertarineqartut saniatigut ilaqutariit meerartaqarnissaat pingaartinneqartoq, Kalaallit Røde Korsiata allattoqarfiani pisortaq Kirsten Mortensen oqaluttuarpoq.

Juullimi ikiuutissatut gavekortimik tunniussisoqassaaq, Nuummilu tunineqartut Nuuk Centerimi niuertarfinnilu Nuuk Handelsstandsforeningimut ilaasortaasunut allanut nioqqutinik pisiniarsinnaassapput.

-KRK-p Ilulissani immikkoortortaqarfia Pisiffik Ilulissat Lions Clubilu suleqatigalugit juullimi gavekortinik 26-inik agguaassissapput, taakkulu decembarip 20-ianit Pisiffimmi pisissutigineqarsinnaanngussapput. Nuummi juullimi ikiuutissat katillugit 200.000 kr.-it sinnilaaraat, Kirsten Mortensen nassuiaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq