Kristinep ilaqutaatalu pigisatik tamarmik Qaqortumi ikuallattoqarnerani annaagaat
Kristine Eskildsenip ilaqutaalu ippassaq ullaakkut tupangaatsiarput.
Nalunaaqutaq ullaassakkut sisamat qaangilaaraa matukkut sakkortuumik kasuttortoqarpoq. Tassungalu pissutissaqarluarpoq, ilaqutariimmi inaat ikuallappoq.
-Tupaqaagut!, Kristine Eskildsen KNR-imut oqarpoq.
- Anillakkama aatsaat takullugu qanoq annertutiginersoq, aatsaat tassani tupannera takkunneruvoq.
Qaqortumi aqqusinermi Kimmernani inissiat arfinillit ikuallapput. Politiit ikuallattoqarnera pillugu nalunaaqutaq 04.18 kalerrinneqarput.
Inissiani sanileriiaani ineqartut qimagussorneqarput aqqusinerlu matuneqarluni. Ikuallannera nalunaaqutaq 7.30-p missaani aqunneqarsinnaalerpoq, nalunaaqutarlu qulit missaanni qamivinneqartoq, Kalaallit Nunaanni Politiit paasissutissiipput.
Iikkat ikuallalersut
Ikuallanneralu Kristine Eskildsenip inaanut aamma annguppoq.
- Ikuallalereersimasoq naborput, igalaava qaareersimallutik, uagut iikkatsinnut tassa aallartilersoq.
Ilaqutariit marlunnik meerartaqartut pigisatik tamarmik annaavaat.
Assi: Poul Svend Møller
- Atisat, nerisassat, sofat, fjernsynit, bærbarit, suna tamaat, illup iluaniisinnaasut suna tamaat. Ajoq, oqaaasinngoruminaappoq.
Ilaqutariit inissiaqarfimmiittut allat peqatigalugit allamut inissinneqarput. Ilaqutariit inigisaminnit anigamik atisatik kisimik atoramikkit nunaqqataasunit atisanik tuniorartipput.
- Aap isumagineqarluarpugut, kisianni tassa pisattagut tamaviisa annaavagut, sapaatip akunnera tullia naatsorsuutigeqquaat inissatsinnik neqeroorfigineqassasugut, Kristine Eskildsen oqarpoq.
- Taava neqeroorfigineqaraluaruttaluunniit nutsersinnaanavianngilagut ingerlaanaq, pisatassaqannginnatta.
Inuk ataaseq putsumik najuussuisimanerminik nakorsarneqartoq
Ikuallattoqarneraut atatillugu inuk ataaseq putsumik najuussuisimanini pissutigalugu napparsimmavimmi nakorsaaserneqarpoq, inunnillu ajoqusertoqanngilaq.
Inissiat arfinillit ikuallattoqarneranit eqqorneqartut maanna najugaqarfigineqarsinnaanngillat, politiit paasissutissiipput.
Politiit qatserisartut peqatigalugit ikuallattoqarnera misissuiffigaat.