Kristian Kristoffersen nakerluinnarpoq
Kristian Kristoffersen 2010-mi OL-qarneranut anngutinngilaq. Taamaattorli 2014-imi OL-qarnissaanut aallaasimi qinngutitaa inissikkiartulereerlugu.
Kristian Kristoffersen nikorfalluni ooqattaasarnermi nunarsuarmi nakernerpaat ilagilersimavaat. Tamanna paasinarsivoq ukiumi unammiffiusumi unamminerit siulliit tallimat aqqusaareerlugit. Taakkunani nikorfalluni 30-riarluni ooqattaasarsimavoq 27-riarlunilu eqqortarsimallugu.
Tamanna imaannaanngitsutut taasariaqarpoq ooqattaasarnermi eqqorniagaq tennisip arsaaraatut angitigisoq 50 meterinik ungasitsigalugu eqqoriarneqartarmat.
Taamaakkaluartorli pikkorinnerpaaniilernissamut aqqutaa suli takivoq.
Qanittumi Kristian Kristoffersen IBU Cup-imi Østrigimi sisorartarfissuami Obertilliachimi unammeqataavoq. Tassani peqataasunit 168-init normu 95-nngorpoq pallungalluni marloriarluni uniornini kinguarsaatigisimallugu.
Øystein Slettemark unamminermi tassani aamma peqataavoq sisamariarlunili uniorami normu 132-nngorpoq.