Kristian Jeremiassen: Ullut ataatsimiiffiit amerlineqartariaqaraluarput

Inatsisartut ataatsimiittarnerat sivitsorneqartariaqartoq Atassutip inatsisartuni ilaasortaatitaat Kristian Jeremiassen oqarpoq, suliat pitsaanerusumik taamaaliornikkut angusaqarfiussagaluartut, Inatsisartuni ilaasortap oqaatigaa.

Siumukkut politikkikkut oqaaseqartartuat Lars-Emil Johansen isumaqataavoq:

- Landsråditoqqamisut ataatsimiittarnerit, tassa upernaami ukiamilu ataatsimiittarnerit qimakkiartuaarneqartariaqartut isumaqarpunga maanna piffissanngortoq. Taarsiullugu ukioq kaajallallugu ataatsimiittarnerit eqqunneqartariaqalerput, Lars-Emil Johansen oqarpoq, nangipporlu:

- Ataatsimiititaliani allatsit nutserisullu inuppalaanngilluinnartumik sulisinneqartarput, taamaammat ullut ataatsimiiffissat siaarlugit ataatsimiiffinngortinneqarnissaannut Kristian Jeremiassenip siunnersuutaa isumaqatigaara, Lars-Emil Johansen oqarpoq.

Ane Hansen Inuit Ataqatigiinneersoq oqarpoq ullut ataatsimiiffissat amerlineqartuuppata pitsaassagaluartoq, sulialli partiip iluani agguataarneqarnerisigut angummassinnaassarlutik, suliassallu tamaasa pingaaruteqartut aamma oqaatigalugu:

- Suliassat tamaasa pingaarutilittut soorunami tigusarpavut, ilaasortallu ataasiakkaat naalakkersuisullu siunnersuutaat tamarmik pingaaruteqarput, taamaattumik tamaasa pingaarutilittut suliarisarpavut, Ane Hansen oqarpoq.

Taamatuttaaq Demokraatit isumaqarput. Jens B. Frederiksen ima oqarpoq:

- Ataatsimiittarnerit sivikippallaarput, oqaluuserisassallu amerlavallaarlutik, taamaammat Inatsisartuni ilaasortaaneq assorujussuaq artornarpoq, Jens B Frederiksen oqarpoq, nangipporlu:

- Pingaarnersiuilluni sulisariaqarsinnaasarnermik oqaaseqarneq isumaqatiginngilarput. Demokraatit pingaarnersiuineq atortorinngilaat, suliassagut naammassisarpagut, suliassalli naammassiniarlugit ulloq unnuarlu sulisariaqartarpugut, tamanna naammaginanngilaq, Jens B. Frederiksen oqarpoq.

Inatsisartut siulittaasoqarfiannit oqaaseqartitsiniaraluaratta iluatsinngilarput.