Kristian Jeremiassen Siumukkunnut ullumi ilaasortanngorpoq

Kristian Jeremiassen pingasunngormat kingullermi tusagassiutinut nalunaaruteqarpoq Atassummiit tunuarluni.

- Atassummiit siulersuisuunerit ukiup affakkaarlugit ataatsimiittarnerat akuttuallaarpoq, suliniutinullu kinguarsaataalluni. Tamannalu partiip iluani susoqannginneranik takussutissaavoq.

Atassut inatsisartunut qinerseqqinnissamut piareersaateqannginnera kiisalu Atassutip partiittut siuarsaasannginnera Kristian Jeremiassenip Atassummit tunuarnerminut tunngavilersuutigai.

Kristian Jeremiassenip kommunalbestyrelsemi ilaasortaajutigaluni inatsisartuni ilaasortaasup Atassutip partiaata kattuffianiit ukiaq kajumissaarneqarsimavoq qinigaaffiup aappaaniit sulinngiffeqarnissaminik kissaateqaqqullugu. Tamannalu inuttaata partiimiit ajattorneqartutut misigisimavaa.

Kristian Jeremiassenip Atassummit tunuarniarnera Atassutip siulittaasuata Finn Karlsenip eqqumiigaa.

- Ataasinngormat apriilip arfernani ajunngivissumik oqaloqatigiippugut. Tassani Kristian Jeremiassen Sisimiuni ataatsimiisitsivoq, tassanilu oqaloqatigiinnermi isornartorsiutinik oqaaseqanngilaq, Finn Karlsen oqarpoq. Nassuiaallunilu Kristian Jeremiassen qinigassanngorteqqinniarani oqaaseqareersoq, akerlianilli Finn Karlsenimut oqarsimavoq Inatsisartunut qinersisoqaqqilerpat taasinerit 200-t maanna angorusullugit.

Kristian Jeremiassenip Qasigiannguani Atassutip immikkoortortoqarfianiit suli ilaasortaasoq Finn Karlsenip oqaatsigaa.