Kristian Jeremiassen nassuiaanneqarusuppoq

Qaasuitsup Kommuniani januaarip naajartulernerani kommuunip karsimiittuutai pissutigalugit aningaasarsiffissap ullua kinguartinneqangajappoq. Tamannalu kommunalbestyrelsemi ilaasortap Kristian Jeremiassenip, Siumumeersup ernumartoqartippaa.
februaarip 11-at 2011 14:23

Taamaattumik januaarip ulluisa 27-ani allakkatigut saaffiginnilluni kommuunip aningaasaqarnikkut inissisimaneranut nassuiaanneqarnissaminik piumasaqarpoq - maannamulli suli akineqarani.

- Killiffik imaannaanngitsuuvoq. Sulisut akissarsinissaat kinguartinneqartariaqaleraluarnikuuvoq kommuunip karsia imaqanngimmat. Suliaq tassunga killiinnassanngitsoq isumaqarpunga. Aningaasaqarnikkut ammanerusumik ingerlatsinissaq kissaatigigakku ujartuivunga. Akisussaavunga akisussaaffigalugu paarerusullugu, Kristian Jeremiassen oqarpoq.

Taanna januaarip ulluisa 27-ani allakkatigut Qaasuitsup Kommunianut aningaasaqarnikkut killiffimmik nassiuaanneqarusulluni saaffiginnippoq:

- Uagut qinikkatut akisussaaffigigatsigu kommuunip aningaasaqarnerata ingerlanneqarnera. Akisussaaffiga paaralugu taamatut apeqquteqarpunga. Sulianillu aamma aallartitsissallunga taamatut apeqquteqarlunga. Maannakkulli suli akineqanngilanga, Kristian Jeremiassen oqarpoq.

Kristian Jeremiassenillu oqaluttuaraa aatsaat siullermeerluni allakkatigut saaffiginninnermini akineqarani. Taamaattumik kommunalbestyrelsep ataatsimiinnissaanut tullermut tamanna qaqinniarlugu aalajangersimavoq:

- Nalunnginnakku saaffiginnissutit Qaasuitsup Kommunianinngaanniit akineqarneq ajortut amerlasoorpassuit, Kristian Jeremiassen oqarpoq.