Kristian Jeremiassen: Matusineq ajortumut sangutitsivoq

juunip 11-at 2007 11:59

- Inuit namminneq aalajangissavaat imigassamik qanoq ittumik pisissanerlutik. Qulaaniit naalakkiineq aqqutissaanngilaq, killormulli sangutitsiinnartartoq kingumut takoqqipparput. Taama oqarpoq Inatsisartuni ilaasortaq Atassummeersoq, Kristian Jeremiassen, aamma Inatsisartut Inatsisinik Atortitsinermut Ataatsimiititaliaanni siulittaasuusoq. Taassuma Qaanaami imigassamik matusineq akerleraa, imalu matusisimaneq nalilerlugu:

- Oqaatigissuara Inatsisartut Inatsisinik atortitsinermut Ataatsimiititaliaat sinnerlugu oqaaseqassannginnama. Inatsisartunili ilaasortatut isummersuutigaara Qaanaami imigassamik matusineq tulluanngittuusoq aamma allamut sangutitsinerusoq. Tassa imigassamik eqqussuinermut aammalu immialiornermut ingerlatsisoqalersoq, taanna inuiaqatigiit akornanni ulorianarnerpaaq massakkut tikissimavarput, isumaqarpungalu taamatut matusineq immini tulluanngitsuusoq, ulorianartumut saatsitsisoqarnera pissutigalugu. Tamatumalu kingorna ajutoortoqassappat assorujuruk kinguneqarnerluttussaammat isumaqarpunga Qaanaami imigassaq ulluni aggersuni ammaqqinneqartariaqartoq.

Kristian Jeremiassen oqaluttuarpoq ippassaani Qaanaamiit kinaassutsiminik isertuussisumik attavigineqarsimalluni taannalu oqaluttuarsimasoq immiorneq taavani ingerlanneqartoq.

- Taamaattumik ilumoortumik oqaaseqarmat isumaqarpunga imigassamik ammaanissaq pisariaqartoq- ajornerusumik kinguneqannginnerani.

Kristian Jeremiassen oqarpoq suliassaq Inatsisartut Inatsisinik atortitsinermut Ataatsimiititaliaanni tiguneqarsimanngitsoq, namminerlu ataatsimiiitaliami ilaasortatut sammissallugu pilersaarutiginngikkini.

- Naalakkersuisut Inatsisartullu immikkoornerat aallaavigalugu, Naalakkersuisut suliassartik suliarimmassuk. Kisianni siunissami aggersumi eqqartorneqarnissaa pisariaqartutut taasariaqarpara.

Kristian Jeremiassen isumaqarpoq Qaanaarmiut namminneerlutik aalajangertariaqaraat Qaanaami imigassaq qanoq pineqassanersoq, nammineerlunilu isumaqarnerarpoq inuit mattussuunneqaratik pineqarnissaat tulluarnerpaasoq.